Միավորված ազգերի զարգացման ծրագրի շրջանակներում ձեռք բերված սարքավորումներն ամրացվեցին վարչապետի աշխատակազմին։

Նման որոշում այսօրվա հերթական նիստին ընդունեց կառավարությունը։

Գույքի արժեքը մոտ 572 հազար եվրո և 17 հազար դոլար է։

Վարչապետի աշխատակազմին փոխանցվեցին 375 տեսախցիկներ և տեսախցիկին հարակից սնուցման սարքեր, 9 սերվեր, 1500 հատուկ մշակված ծրագրային փաթեթ, չորսական պրոցեսոր, օպերատիվ հիշողության սարքեր, օդափոխիչներ, 8 կոշտ սկավառակներ։

Միավորված ազգերի զարգացման ծրագրի և վարչապետի աշխատակազմի միջև մարտի 10-ին կնքվել է պայմանագիր, որով այդ սարքավորումները որպես սեփականություն փոխանցել են վարչապետի աշխատակազմին` Հայաստանում ընտրական գործընթացների աջակցություն ծրագրի շրջա­նակ­ներում։