Երևան քաղաքի ընդհանուր իրավասության դատարանում, նախագահությամբ դատավոր Էդիկ Ավետիսյանի, այսօր մեկնարկեց երկրորդ նախագահ Ռոբերտ Քոչարյանն ընդդեմ գործարար Սիլվա Համբարձումյանի գործով առաջին դատական նիստը, որը, սակայն, րոպեներ տևեց: Գործարար Սիլվա Համբարձումյանը նիստի մասին պատշաճ ծանուցված չէր:

Նիստերի քարտուղարը նշեց, որ Համբարձումյանի ծանուցումն իրականացվել է նրա հաշվառման հասցեի վարչական ղեկավարի միջոցով, որտեղից մինչ օրս պատասխան չի ստացվել: Հայցվոր Ռոբերտ Քոչարյանի պաշտպան Արամ Օրբելյանը դատարանին տրամադրեց Համբարձումյանի երկու հասցե՝ վերջինիս պատշաճ ծանուցելու համար՝ միաժամանակ նշելով, որ Համբարձումյանն առնվազն լրատվամիջոցներից հստակ տեղեկացվել է այսօրվա նիստի մասին:

Դատավոր Էդիկ Ավետիսյանը դատական նիստը հետաձգեց մինչև սեպտեմբերի 26-ը՝ պատճառաբանելով, որ նշված ժամանակահատվածն անհրաժեշտ է Սիլվա Համբարձումյանի պատշաճ ծանուցումն ապահովելու համար:

Այսօր ապրիլի 16-ն է, այսինքն՝ ստացվում է, որ դատարանին հինգ ամիս է անհրաժեշտ՝ Համբարձումյանի պատշաճ ծանուցումն ապահովելու համար:

Հիշեցնենք, որ հայցի համար հիմք է հանդիսացել Սիլվա Համբարձումյանի՝ 2018 թվականի նոյեմբերի 2-ի ասուլիսի ժամանակ հնչեցրած արտահայտությունները:

«Ես 2008 թվականին խոշոր գործարք եմ արել արաբների հետ և ինձ չխանգարելու համար վճարել եմ հանրապետության նախագահին՝ Քոչարյան Ռոբերտին»,- ասել է Սիլվա Համբարձումյանը:

Հայցվոր կողմն այժմ պահանջում է զրպարտություն համարվող փաստացի տվյալների հերքում և 2 մլն դրամ փոխհատուցում:

Լրագրողների հետ զրույցում Արամ Օրբելյանն ասաց, որ եթե Սիլվա Համբարձումյանը դատարանում հերքի իր արած արտահայտությունները, ապա հայցվոր կողմը, հնարավոր է, հրաժարվի դրամական փոխհատուցման պահանջից:

Նշենք, որ Քոչարյանին այժմ Համբարձումյանի հայտնած տեղեկությունների հիման վրա կաշառք ստանալու մեղադրանք է առաջադրված, որը կքննվի Մարտի 1-ի գործի հետ մեկ վարույթում: