Կառավարությունն այսօրվա նիստին որոշեց Տավուշի մարզի Բերդ քաղաքում ստեղծել «Բերդի զինվորական հոսպիտալ»։

Հոսպիտալը զինծառայողների, նրանց ընտանիքների անդամների, ինչպես նաև բնակչությանը հիվանդանոցային և արտահիվանդանոցային բժշկական օգնություն, սպասարկում կցուցաբերի։

Կառավարություն ներկայացված որոշման նախագծում նշվում է, որ զինված ուժերի անձնակազմի և նրանց ընտանիքների անդամների բժշկական ապահովումը պաշտպանական գերատեսչության կարևորագույն խնդիրներից մեկն է։ Բացի այդ, «Զինվորական ծառայության և զինծառայողի կարգավիճակի մասին» օրենքը սահմանում է, որ զինծառայողները և նրանց ընտանիքների անդամները պետք է ապահովվեն անվճար որակյալ բուժօգնությամբ համապատասխան գերատեսչական բուժհիմնարկներում:

«Այս համատեքստում կարևորվում է հոսպիտալի ստեղծումը, որը պետք է իրականացնի մասնագիտացված բժշկական օգնություն, ինչն իրենից ներկայացնում է ախտորոշման և բուժման հատուկ մեթոդների ու բարդ բժշկական տեխնոլոգիաների վրա հիմնված բժշկական օգնության և սպասարկման տեսակ, որը նախատեսում է բժշկական միջոցառումների համալիր կիրառում` ախտորոշում, բուժում, անմիջական բժշկական հսկողություն, ինչպես նաև ռազմաբժշկական փորձաքննություն»,- նշված է որոշման նախագծում։

«Բերդի զինվորական հոսպիտալ»-ը կապահովի հիվանդանոցային բուժման համար անհրաժեշտ միջոցների ամբողջ ծավալը՝ հիվանդին հիվանդասենյակով ապահովում, մասնագիտացված կոնսուլտացիաներ, լաբորատոր-գործիքային ախտորոշիչ հետազոտությունների անցկացում, վիրահատություններ, վիրահատական և ֆիքսող միջոցներ, բուժական միջամտություններ, անհրաժեշտ դեղերով, պարտադիր սննդով ապահովումը և այլ ծառայություններ։

Պաշտպանության նախարարության հաղորդմամբ՝ հոսպիտալի ստեղծմամբ նոր հաստիքներ չեն ստեղծվի, այն ձևավորելու է պաշտպանության նախարարությունում գործող առանձին բժշկական ջոկատի բազայի վրա` ջոկատի պահպանման ծախսերի ուղղությամբ պետական բյուջեով պաշտպանության նախարարությանը հատկացված միջոցների հաշվին: