Սողանքներ, հեղեղումներ, քարաթափումներ՝ եղանակային փոփոխության արդյունքում
Կառավարության այսօրվա նիստի մեկնարկին Արտակարգ իրավիճակների նախարար Ֆելիքս Ցոլակյանը հայտնեց, որ տեղումները դեռ կշարունակվեն, ապրիլի 20-ին առավել ինտենսիվ կլինեն, իսկ լեռնային շրջաններում տեղումները կլինեն ձյան տեսքով։
Նախարարի փոխանցմամբ՝ արդեն առաջին հեղեղումների մասին ահազանգ են ստացել։ Այն եղել է Արմավիրի մարզի Երվանդաշատ գյուղից։ «Այնտեղ գետի ջրերը բարձրանում են և կարող են դաշտերը ծածկել։ Պարոն Պապիկյանի հետ ես խոսել եմ արդեն, մենք պայմանավորվել ենք՝ գնանք»,- նշեց նախարարը։
Նրա փոխանցմամբ՝ երեկ նախարարության աշխատակիցները այցելել են Երվանդաշատ և պարզել, որ շատ աշխատանքներ կան իրականացնելու։
Ֆելիքս Ցոլակյանը տեղեկացրեց, որ այս օրերին ակտիվացել են նաև սողանքները, 6 տեղանքում արդեն ակտիվ սողանքներ են գրանցվել, մասնավորապես՝ Լոռու մարզի Աթան գյուղում։ Ասում է՝ այնտեղ գրանցված սողանքի պատճառվ կարող է մոտ 600 հազար տոննա հող լցվել ճանապարհի վրա և փակել միջհամայնքային ճանապարհը։
Նախարարը հայտնեց, որ քարաթափման վտանգ ևս կա և առաջարկեց տրանսպորտի, կապի և տեղեկատվական տեխնոլոգիաների, տարածքային կառավարման և զարգացման նախարարություններին, մարզպետարաններին` ունենալ որոշակի գումար, որը կկարողանան օգտագործել քարերի պայթեցման համար և չեն սպասի գումարի հատկացմանը, մրցույթի անցկացմանը։
Վարչապետ Նիկոլ Փաշինյանն ընդգծեց, որ ճգնաժամային իրավիճակներ չունենալու համար պետք է իրականացնել կանխարգելիչ միջոցառումներ։ Նշեց, որ անընդատ ահազանգ են ստանում, որ օպերատիվ հարցեր առաջանալու դեպքում հնարավոր չի լինում լուծել դրանք, և պետք է հասկանալ` որտեղ է խնդիրը ու կարգավորել դրանք։
Մեկնաբանել