Հունիսի 9-ին Քարաձորում համայնքապետի և ավագանու անդամների արտահերթ ընտրություն է
Հունիսի 9-ին Լոռու մարզի Քարաձոր համայնքում կանցկացվի համայնքապետի և ավագանու անդամների արտահերթ ընտրություն։ Նման որոշում կառավարությունը կայացրեց այսօր։
Ինչպես նշված է կառավարություն ներկայացված որոշման նախագծում՝ Քարաձորի համայնքապետ Արա Մատինյանը մարտի 4-ին հրաժարականի դիմում է ներկայացրել։ Նա համայնքի ղեկավարի պաշտոնում ընտրվել էր 2016 թվականի հոկտեմբերի 2-ի ընտրություններով:
Համայնքի ավագանու չորս անդամներ ևս մարտի 11-ին հրաժարականի դիմումներ են ներկայացրել, իսկ ավագանու անդամներից մեկի լիազորությունները դադարեցվել են 2017 թվականի հունվարի 25-ին՝ մահվամբ պայմանավորված։ «Այդ հանգամանքով պայմանավորված՝ անհնարին է դարձել Քարաձոր համայնքի ավագանու նիստերի հետագա անցկացումը, քանի որ ավագանու անդամների թվաքանակը նվազել է օրենքով սահմանված թվաքանակի կեսից ավել չափով: Այդ կապակցությամբ Քարաձոր համայնքի ավագանու անդամները մարտի 11-ին կազմել են Քարաձոր համայնքի ավագանու լիազորությունների վաղաժամկետ դադարեցման վերաբերյալ արձանագրություն»,- ասվում է որոշման նախագծում։
Ավագանու անդամները ևս այդ պաշտոնում ընտրվել էին 2016 թվականի հոկտեմբերի 2-ին կայացած ընտրություններում։
Մեկնաբանել