Քիչ առաջ ՀՀԿ պատգամավորները մի կերպ իրականացրեցին օրենքի նախագծերի քվեարկությունները, իհարկե, նաեւ այլ պատգամավորների փոխարեն քվեարկելով: Օրինակ, ՀՀԿ-ական պատգամավոր, առողջապահության, մայրության եւ մանկության հարցերի մշտական հանձնաժողովի նախագահ Արա Բաբլոյանը բացահայտ քվեարկում էր նաեւ իր կողքին նստող այլ պատգամավորի փոխարեն: Հավանաբար, այդ պահին Ա. Բաբլոյանը «հպարտանում» էր, որ «օգնում» է իր կուսակցությանը:

Ընդդիմադիր «Ժառանգություն» եւ ՀՅԴ խմբակցությունների պատգամավորների ջանքերով չընդունվեց պատգամավոր Դավիթ Հարությունյանի հեղինակած «Դատական եւ համայնքային ծառայության մասին» օրենքի նախագիծը:

«Ժառանգությունից» Ստյոպա Սաֆարյանը նշեց, որ օրենքում նախատեսվող փոփոխություններն անհամաչափ են, այդ իսկ պատճառով իրենց խմբակցությունը դեմ է քվեարկելու օրինագծին: 62 կողմ եւ 1 դեմ ձայների հարաբերակցությամբ տապալված նախագծի քվեարկությունից հետո վարման կարգի վերաբերյալ ձայն խնդրեց ՀՅԴ խմբակցության պատգամավոր Վահան Հովհաննիսյանը:

«Ես չէի ուզում նախազգուշացնել, բայց մեր չքվեարկելը՝ նկատի ունեմ ՀՅԴ խմբակցության քվեարկությանը չմասնակցելը, բացատրվում է ճիշտ նույն քաղաքական դրդապատճառներով, որոնց մասին խոսեց «Ժառանգության» մեր գործընկերը»,- ասաց Վ. Հովհաննիսյանը:

Դրանից հետո Սամվել Նիկոյանը գրեթե խնդրում էր Դավիթ Հարությունյանին, որ նա էլ վարման կարգի վերաբերյալ մի քանի խոսք ասի: Վերջինս էլ իր հեղինակած օրենքի տապալման փաստից վրդովված ԱԺ նախագահին հորդորեց, որ ընդհատի այն պատգամավորների ելույթները, որոնք ամենեւին չեն խոսում վարման կարգի վերաբերյալ: Պատգամավորը նկատի ուներ հենց Ստյոպա Սաֆարյանին:

Սամվել Նիկոյանն էլ շատերի համար զարմանալի հարց տվեց Դավիթ Հարությունյանին. «Կանոնակարգն այդ իրավունքը տալի՞ս է նիստ վարողին»: Փաստորեն, ԱԺ նախագահը չգիտի, թե ԱԺ կանոնակարգով ինչ լիազորություններ ունի:

Այսօր քվեարկության չդրվեց «Կանխիկ գործառնությունների սահմանափակման մասին» օրենսդրական նախագծերի փաթեթը: Գալուստ Սահակյանը պատճառաբանեց, թե օրենքի լրամշակումից հետո այն նորից կներկայացվի քվեարկության:

Իրենց առաքելությունն ավարտած համարելով՝ ԱԺ պատգամավորների մեծ մասը կամաց-կամաց նիստերի դահլիճը լքեց: