Ազգային ժողովն ընդմիջումից հետո շարունակեց աշխատանքները: Սկզբում դահլիճ մտան ԱԺ նախագահ Սամվել Նիկոյանն ու փոխնախագահ Էդուարդ Շարմազանովը: Վերջինս տեսնելով, որ դահլիճը դատարկ է, ծիծաղելով Սամվել Նիկոյանին ասաց. «Կարողա՞ մենակ մենք ենք լինելու»: Այդ պահին արդեն իր տեղում նստած էր ընդդիմադիր պատգամավոր Լարիսա Ալավերդյանը, ում դատարկ դալիճի անդրադարձին ի պատասխան՝ Սամվել Նիկոյանը կատակեց. «Ազգային ժողովը բաղկացած է ԱԺ նախագահից, տեղակալից եւ «Ժառանգությունից»»:

«Ես էլ դա եմ ասում, էլի»,- պատասխանեց Լարիսա Ալավերդյանը: Հենց այս պայմաններում էլ խորհրդարանում քննարկվում է պատգամավորներ Դավիթ Հարությունյանի, Վարդան Բոստանջյանի եւ Հեղինե Բիշարյանի ներկայացրած «Ազգային ժողովի կանոնակարգ» ՀՀ օրենքում փոփոխություններ եւ լրացումներ կատարելու մասին օրինագիծը, որը վերաբերում է նաեւ պատգամավորների էթիկայի հանձնաժողովի ստեղծմանը: