Շրի Լանկայի եկեղեցիներում և հյուրանոցներում պայթյուններ են որոտացել. կան հարյուրավոր զոհեր և վիրավորներ
Սուրբ Զատիկի տոնակատարությունների օրը մի քանի պայթյուններ են որոտացել Շրի Լանկայի եկեղեցիներում և հյուրանոցներում: BBC-ի ռուսական ծառայությունը հայտնում է 160 զոհի և հարյուրավոր վիրավորների մասին, իսկ տեղական News 1st հեռուստաընկերության տեղեկություններով՝ զոհերի թիվը հասնում է 190-ի, իսկ վիրավորներինը՝ 500-ի:
Սուրբ Զատիկի արարողությունների ժամանակ պայթյուններ են որոտացել Կոչիկադե, Բատիկալոա և Նեգոմբո քաղաքների եկեղեցիներում, ինչպես նաև մայրաքաղաք Կոլոմբոյի կենտրոնում գտնվող «Շանգրի-Լա», «Սինամոն-Գրանդ» և «Քինգսբերի» հյուրանոցներում:
«Ֆրանս-Պրես»-ը, հղում անելով իրավապահ համակարգում իր աղբյուրներին, գրում է, որ զոհերի մեջ կան առնվազն 35 օտարերկրացիներ: Պայթյունների պատասխանատվությունը դեռևս ոչ ոք իր վրա չի վերցրել:
Կոլոմբոյի արքեպիսկոպոս Մալկոլմ Կարդինալ Ռանջիթի որոշմամբ՝ Կոլոմբոյի շրջանում Սուրբ Զատիկին նվիրված բոլոր արարողությունները չեղարկվել են:
Շրի Լանկայի վարչապետ Ռանիլ Վիկրամասնիգհեն դատապարտել է կատարվածը՝ այն որակելով «վախկոտ հարձակում ժողովրդի դեմ»: Նա կոչ է արել քաղաքացիներին զերծ մնալ չճշտված տեղեկատվության տարածումից:
Շրի Լանկան կղզի-պետություն է Հարավային Ասիայում: Բնակչությունը կազմում է մոտ 22 միլիոն մարդ, որոնց 70%-ը՝ բուդդայականության, 12,6%-ը՝ հինդուիզմի, 9,7%-ը՝ իսլամի, իսկ 7,6%-ը քրիստոնեության հետևորդներ են:
Մեկնաբանություններ (1)
Մեկնաբանել