![](/static/articles/01/03/06/l-givhf62fmw.jpg)
Հայ ուսանողների կրթաթոշակային ֆոնդին Հովնանյան հիմնադրամի աջակցությունը գերազանցեց 1.7 միլիոն ԱՄՆ դոլարը
Վերջին նվիրատվությունը Վիլլանովայի Հովնանյան կրթաթոշակային ֆոնդին կազմել է $ 500.000
Հրայր և Աննա Հովնանյան հիմնադրամը ևս $ 500.000 նվիրաբերեց Վիլլանովայի համալսարանի «Հովնանյան կրթաթոշակ» ավանդաշնորհային ֆոնդին, որն այժմ կազմում է 1 մլն 700 հազար ԱՄՆ դոլար: Հովնանյան կրթաթոշակը լավ հնարավորություններ է ստեղծում ծագումով հայ տաղանդավոր ուսանողների համար: Կրթաթոշակը ծածկում է ստացողի ուսման, տան և սննդի վարձերը և ամեն տարի ենթակա է վերականգնման:
1990թ.-ից` հիմնադրումից սկսած առ այսօր «Հովնանյան կրթաթոշակ» ֆոնդի լրիվ կամ մասնակի կրթաթոշակի շահառուներ են դարձել Վիլլանովայի համալսարանի 79 ուսանողներ:
«Այս լրացուցիչ նվիրատվությունը երկակի դրդապատճառ ունի, - բացատրում է Վիլլանովայի 1956թ. շրջանավարտ պրն Հովնանյանը, - Ամբողջ մոլորակում կան հսկայական թվով շնորհալի հայ ուսանողներ, մյուս կողմից էլ ես շատ հպարտ եմ, որ Վիլլանովան այսօր դարձել է հիանալի ուսումնական հաստատություն: Ուստի, ես ուզում եմ, որ հնարավորինս մեծ թվով երիտասարդ չափահաս հայեր` թե Միացյալ Նահանգներում և թե ամբողջ աշխարհում, հնարավորություն ունենան ստանալու այն գերազանց կրթությունը, որ այսօր առաջարկում է Վիլլանովայի համալսարանը»:
«Մենք խորապես զգացված ենք Վիլլանովայի համալսարանի և մեր ուսանողների նկատմամբ Հովնանյան հիմնադրամի ցուցաբերած շարունակական աջակցությունից և այս նոր նվիրատվությունից,- ասաց համալսարանի զարգացման գծով փոխնախագահ Մայքլ Ջեյ Օ’Նիլը,- Վիլլանովան առհասարակ պարտավորվածություն ունի ներգրավելու մտավոր, սոցիալական, ռասայական և տնտեսական տարբեր ծագում ու նկարագիր ունեցող ուսանողների, ովքեր թե ուսանողության տարիներին և թե ավարտելուց հետո կծառայեն որպես կրթական, քաղաքացիական և մշակութային առաջնորդներ: Մենք մեծապես երախտապարտ ենք Հիմնադրամի առատաձեռնության և մեր այս առաքելությանը շարունակաբար աջակցելու համար»:
2012-13 ուսումնական տարվա Հավնանյան կրթաթոշակի համար դիմելու ցանկություն ունեցող թեկնածու ուսանողները պետք է դիմեն ֆինանսական օժանդակության գծով տնօրենի օգնական Մերիքեյ Կլարային` 610-519-7933 հեռախոսահամարով: Դիմել կարող են Վիլլանովայի համալսարանի ներկա ուսանողները և 2012-13 ուսումնական տարում այդ համալսարան ընդունվածնեan: Հովնանյան կրթաթոշակի դիմումի ձևը հասանելի կլինի առցանց` սկսած 2013-14 ուսումնական տարվանից:
Ավելի քան 25 տարի է, ինչ Հրայր և Աննա Հովնանյան հիմնադրամն աջակցում է հայ մշակույթին և կրթությանը, առողջապահական հիմնարկներին, արվեստներին և այլ ոլորտների: Հրայր և Աննա Հովնանյանները ծառայում են որպես համապատասխանաբար` հիմնադրամի նախագահ և պրեզիդենտ: Հիմնադրամը ստեղծվել է 1986թ., կենտրոնական գրասենյակը գտնվում է Թինտոն Ֆոլզ քաղաքում, Նյու Ջըրզի նահանգ:
1963թ. Հրայր Ս. Հովնանյանը հիմնեց Հովսոնս ինք. ընկերությունը, որը տասնամյակների ընթացքում կառուցել է տասնյակ հազարավոր տներ` յուրացնելով հազարավոր հեկտար հողատարածություններ: Նրա հետաքրքրությունների շրջանակում են նաև առողջապահական արդյունաբերության և կոմերցիոն շինարարության ոլորտներում զգալի հսկիչ փաթեթների տիրապետող ընկերությունների տնօրինումը` սեփականատիրության կամ կառավարչական հիմունքներով, ընդ որում հիմնական ուղղվածությունը առևտրի կենտրոնները և գրասենյակային շինություններն են:
Հրայր և Աննա Հովնանյաններն ունեն հինգ երեխա և մի քանի թոռներ: Նրանց որդին` Վիլլանովայի համալսարանի հումանիտար արվեստների և գիտությունների քոլեջի 1987թ. շրջանավարտ Արմեն Գ. Հովնանյանը Հիմնադրամի գանձապետն է: Այս զույգի դուստրերն են` Սիրան Սահակյանը, Էդիլ Հովնանյանը, որը ծառայում է որպես Հիմնադրամի փոխպրեզիդենտ, Տանյա Հովնանյան-Բազդասարյանը և Լիլա Հովնանյանը: Ի դեպ, Հրայր և Աննա Հովնանյանների թոռ, Սիրան Սահակյանի որդի Գոռ Թ. Սահակյանը Վիլլանովայի համալսարանի Բիզնեսի դպրոցի առաջին կուրսի ուսանող է:
Սկսած 1842թ.-ից, Վիլլանովայի համալսարանի ավգուստինյան կաթոլիկ ինտելեկտուալ ավանդույթը անկյունաքար է հանդիսանում ակադեմիական մի հանրության համար, որտեղ ուսանողները սովորում են մտածել քննադատաբար, գործել զգացմունքով և հաջողության հասնել` ծառայելով այլոց: Համալսարանի հինգ քոլոջներում` Ազատական արվեստների և գիտությունների քոլեջում, Վիլլանովայի բիզնես դպրոցում, Ճարտարագիտության քոլեջում, Բժշկական քոլեջում և Վիլլանովայի համալսարանի իրավագիտության դպրոցում սովորում են բակալավրիատի, մագիստրատուրայի և իրավագիտության 10 հազար ուսանողներ: Ուսանողների մտավոր պաշարի զարգացմանը զուգահեռ Վիլլանովա համալսարանը նրանց պատրաստում է նաև որպես էթիկական առաջնորդներ, ովքեր դրական փոփոխություններ են մտցնում ամենուրեք, որտեղ էլ որ կյանքը նրանց տանի:
Մեկնաբանություններ (1)
Մեկնաբանել