Անակնկալ այց ոստիկանությունից կամ «Վարկ նույնիսկ սև ցուցակով»
Այսօրվա նյութիս «հերոսներից» մեկը ես եմ, բայց ոչ իմ կամքով: Իմ անձնագրի պատճենն օգտագործվել է մի գործարքում, որի հետ ամենևին կապ չունեմ: Քաղաքացու ահազանգով ոստիկանությունը զբաղվել է դրանով, սակայն ոչինչ չի բացահայտել:
Ապրիլի 1-ին մեր տան դուռը թակում է ոստիկանի համազգեստով մի տղամարդ և ներկայանում ոստիկանության Վաղարշապատի բաժնի համայնքային ոստիկան: Նա ինձ էր հարցնում: Տեղեկանալով, որ ճիշտ է եկել, ներս մտնելու թույլտվություն է խնդրում: Ոստիկանը միանգամից մեղադրական տոնով հարցնում է. «Էս ի՞նչ վարկային պատմություն է»: Անակնկալի եմ գալիս, իսկ նա շարունակում է նույն տոնայնությամբ հարցեր ուղղել: «Անահիտ Հովսեփյանին ճանաչու՞մ ես, ու ի՞նչ կապ ունես «Վարկ նույնիսկ սև ցուցակով» կազմակերպության հետ»,- ասում է ոստիկանը: Զգալով, որ հարցերն անտեղի են, քանի որ թեման ինձ անհասկանալի է, բացատրեց, որ կատարում է հանձնարարական՝ ոստիկանի Արտաշատի բաժնում նախապատրաստվող նյութերի շրջանակներում, իսկ ես պետք է բացատրություն ներկայացնեմ:
Պարզվեց, որ մարտի 27-ին Արարատի մարզի Նշավան գյուղի բնակիչ Անահիտ Հովսեփյանը ոստիկանության Արտաշատի բաժնում հաղորդում է ներկայացրել, որ «Վարկ նույնիսկ սև ցուցակով» անվամբ գրանցված ֆեյսբուքյան էջի միջոցով իրեն են փոխանցել «Իդրամ» վճարային համակարգում բացված հաշվեհամար և նշել, որ գումար փոխանցելուց հետո Անահիտին կհանեն վարկային «սև ցուցակից»: Օնլայն հարթակում Անահիտի զրուցակիցը ներկայացել է որպես տնօրեն Արմեն Վիրաբյան և վստահություն շահելու համար ուղարկել է իր անձնագրի պատճենը և իմ՝ Գրիշա Բալասանյանիս նույնականացման քարտի պատճենը:
Եղանք Նշավան գյուղում: Անահիտ Հովսեփյանը «Հետք»-ին պատմեց, որ մարտի 15-ին «Ֆեյսբուք» սոցիալական ցանցում իրեն ընկերության հայտ է ուղարկել «Վարկ նույնիսկ սև ցուցակով» օգտատերը: Անահիտին էջի անունը գրավել է, քանի որ ինքն իրականում ունեցել է դասակարգված վարկային պատմություն: Անահիտը օնլայն հարթակում հետաքրքրվել է, թե ինչպես կարող է վարկ ստանալ՝ լինելով «սև ցուցակում»: Պատասխանել են, որ առաջին հերթին իրենք օգնում են քաղաքացուն դուրս գալ բանկային «սև ցուցակից»: Անահիտից պահանջել են հանրային համարանիշի տվյալները, որպեսզի ճշտեն, թե նա որ բանկում ունի վարկեր և ինչու է «սև ցուցակում» հայտնվել:
«Ինձ մի քիչ հավատ ներշնչեց, որ իրենք ինձ ուղարկեցին տվյալներ, թե ես որ բանկում ինչ խնդիր եմ ունեցել»,- ասում է Անահիտ Հովսեփյանը: Այնուհետև Անահիտից պահանջել են 60.000 դրամ՝ «Իդրամ» համակարգում գրանցված հաշվին փոխանցում կատարելու եղանակով:
«Իրենք հեռախոսահամար տվեցին: Զանգեցի, աղջիկ պատասխանեց, ու այդ աղջիկն ասաց, որ ինքն ընդամենը գործը կատարողն է, իսկ հիմնական զրույցները պետք է տեղի ունենան մեսինջերի զանգի միջոցով՝ տնօրենի հետ: Տնօրենն ինձ ուղարկեց Ձեր և մեկ ուրիշ քաղաքացու կապույտ անձնագրի նկարները, իբր թե իր անձնագրի տվյալներն են: Ձեր նույնականացման քարտի նկարը փակ էր, իմ մտքով չանցավ, որ դրանք կարող են տարբեր մարդկանց անձնագրեր լինել: Հետո եմ իմացել, որ նույն մարդու անձնագրերը չեն»,- նշում է Անահիտը:
Դարձյալ օնլայն հարթակում զրույցների միջոցով Անահիտին հավաստիացրել են, որ իրենք կօգնեն դուրս գալ «սև ցուցակից» և նոր վարկ վերցնել: Սակայն, Անահիտն ասել է, որ 60.000 դրամ չունի: Պատասխանել են տիկնոջը, որ նա կարող է կեսը հիմա ուղարկել, մյուս մասը՝ հետո:
«Փոխանցում կատարելու օրը ինձ ուղարկեցին «Իդրամի» հաշվեհամարը: Այդ օրն իմ մոտ այդքան գումար էլ չկար, պայմանավորվեցինք, որ 20.000 դրամ փոխանցեմ: Այդպես էլ արեցի, 20.000 դրամը փոխանցեցի իրենց ասած հաշվին: Դրանից հետո պահանջեցին իմ անձնագիրը և սոցիալական քարտը նկարեմ և ուղարկեմ իրենց, որ իրենք ձևակերպումներն անեն»,- պատմում է Անահիտ Հովսեփյանը:
Տիկնոջ ասելով՝ իրեն խոստացել էին մի 2 ժամից կապ հաստատել, որպեսզի աշխատակցի հետ իբր առավոտյան գնան «Յունիբանկ» կամ «Արդշինբանկ» նոր վարկ ձևակերպելու համար: Վարկը լինելու էր 300.000 դրամի շրջանակում: Սակայն, այդ խոսակցությունից 3 ժամ հետո Անահիտը «Վարկ նույնիսկ սև ցուցակով» էջին նամակ է ուղարկել, թե ինչ նորություն կա: Անահիտի նամակին չեն պատասխանել և անմիջապես արգելափակել են նրա ֆեյսբուքյան էջը, որպեսզի չկարողանա գրել:
«Իրենց հետ բոլոր կապերը խզվեց, այդ աղջկա համարն արդեն անհասանելի էր, և այդպես էլ չկարողացանք գտնել»,- ասում է Անահիտը: Նա դրանից հետո վախեցել է, որ իր անձնագրի տվյալները կարող են օգտագործվել այլ նպատակներով և դիմել է ոստիկանություն: Անահիտն ասում է, որ ոստիկանությանն է հանձնել իրենց խոսակցությունների պատճենները, ուղարկված անձնագրերի նկարները: Սակայն, հեռախոսահամարը, որով ընդամենը մեկ անգամ էր զանգել «Վարկ նույնիսկ սև ցուցակով» էջի աշխատակից ներկայացած աղջկան, հեռախոսից ջնջվել էր:
Այդ դեպքից հետո Անահիտը ամուսնու հետ զննել է իրեն ուղարկված անձնագրերի պատճենները և նկատել, որ ուղարկված նույնականացման քարտում անուն չի երևում: Այն, որ այդ անձը հաստատող փաստաթուղթը պատկանում է ինձ՝ Գրիշա Բալասանյանիս, պարզել են ոստիկանությունում:
«Մեջս միշտ կասկած կար: Նույնիսկ իրենց գրեցի՝ կարո՞ղ է սա խաբեություն է: Պատասխանեցին, թե իրենք մեծ ընկերություն են, և վիրավորում եմ իրենց աշխատակիցներին, քանի որ 20.000 դրամի խաբեությամբ չեն զբաղվում»,-ասում է Անահիտ Հովսեփյանը:
Անահիտն ասում է, որ ունի մանկահասակ երեխա: Ոստիկանությունում քաշքշուկները շատ էին, իրեն տանում-բերում էին, ինչն անհարմարություն էր պատճառում, ապրիլի 5-ին դիմում է գրել ոստիկանությունում, որ իր հաղորդումը թողնեն անհետևանք: Մինչ օրս նա չգիտի, թե ով է իրեն խաբել: Արմեն Վիրաբյանը, որի անձնագրի պատճենը ևս ուղարկվել էր Անահիտ Հովսեփյանին, դարձյալ բացատրություն է տվել, որ ինքը տեղյակ չէ, թե ինչպես է իր անձնագրի պատճենը հայտնվել տիկնոջ մոտ:
«Ինչու դիմումս հետ վերցրի, որովհետև անընդհատ տանում-բերում էին, ու հետն էլ ասացին, որ քրեական գործ չի հարուցվի, որովհետև օրենքով մինչև 30.000 դրամը չի համարվում խարդախություն: Միայն ես էի քաշքշուկի մեջ ընկնում: Իմ մտահոգությունն այն է, որ հետագայում իմ անձնագրի պատճենով որևէ գործարք չանեն»,- ասում է Անահիտ Հովսեփյանը և հավելում, որ ոստիկանության աշխատակիցը նույնիսկ նշել է, որ իրեն խաբած անձը գուցե դատապարտյալ է, քրեակատարողական հիմնարկից հաճախ են նման արարքներ կատարում, ինչը բացահայտելը շատ դժվար է:
Ոստիկանության Արտաշատի բաժնի ՀՈԲ տեսուչ Ա. Հարությունյանը 05.04.2019թ. որոշում է կայացրել քրեական գործ հարուցելը մերժելու մասին, ըստ որի՝ «ձեռնարկված օպերատիվ-հետախուզական միջոցառումներով դեռևս հնարավոր չի եղել պարզել, թե «Վարկ նույնիսկ սև ցուցակով» կայքէջը ում է պատկանում, և ով է Ա. Հովսեփյանին հաղորդագրություններ ուղարկել, պարզվել է միայն, որ Ա. Հովսեփյանը 27.03.2019թ. այդ կայքէջի կողմից ուղարկված հաշվեհամարին փոխանցել է 20.000 ՀՀ դրամ գումար»:
Զավեշտ է այն, որ ոստիկանությունն, ունենալով «Իդրամ»-ի հաշվեհամարը՝ 553491884, որին էլ փոխանցվել է 20,000 դրամը, չի կարողացել պարզել խաբեությամբ զբաղվող մարդկանց ինքնությունը: Քանի որ փոխանցված գումարը 30,000 դրամից քիչ է եղել, որոշում է կայացվել նախապատրաստված նյութերով քրեական գործի հարուցումը մերժել:
Չի բացառվում, որ նույն եղանակով այլ անձինք ևս տուժած լինեն:
Մեկնաբանել