![](/static/articles/01/03/18/l-7y5hSYcmlE.jpg)
«Իլյիչի ժամանակներն» անցե՞լ են
Այսօր հայտարարությունների ժամին ԱԺ ՀՅԴ խմբակցության ղեկավար Վահան Հովհաննիսյանը, անդրադառնալով Հայաստանի արտաքին քաղաքականությանը, քաղաքական գործիչներին խորհուրդ տվեց հաջողությունները չանձնավորել, ինչպես անում էին «Իլյիչի ժամանակ»:
Ըստ պատգամավորի՝ Սենատում ձեռք բերված հաջողությունների մասին խոսելիս պետք է շնորհակալություն հայտնել այնտեղ 45 տարի «կռված» մեր ժողովրդին, արտերկրի հայությանը, ինչպես նաեւ Հայ դատի գրասենյակներին:
Այնուհետեւ Վահան Հովհաննիսյանը սահուն անցում կատարեց Հայաստանի ներքաղաքական խնդիրներին: Անդրադառնալով կառավարության գործունեության ծրագրով նախատեսված եւ չկատարված աշխատանքներին` պատգամավորն ասաց, թե կառավարությունը պետք է ԱԺ-ին առնվազն զեկուցեր եւ տրամաբանական պատասխաններ տար՝ բացի միջազգային ճգնաժամն ու վատ բնակլիմայական պայմանները որպես պատճառ նշելուց:
Վահան Հովհաննիսյանը պատգամավորներին հիշեցրեց, որ ՀՅԴ խմբակցությունը առաջարկել էր միասին դիմել Սահմանադրական դատարան, որպեսզի ՍԴ-ն պարզաբանի, թե խոստումների չկատարման դեպքում ի՞նչ պետքէ անի կառավարությունը՝ նոր ծրագիր հաստատի՞, թե՞ անհրաժեշտ է նոր կառավարություն ձեւավորել:
«Դրա համար պետք էր ընդամենը 27 ստորագրություն: Սակայն այս առաջարկությանը դրական արձագանքեց միայն «Ժառանգություն» խմբակցությունը: Մնացած խմբակցությունները չպատասխանեցին` հենց դրանով էլ, փաստորեն, ստանձնելով կառավարության գործունեության պարտակումը»,- ավելացրեց Վահան Հովհաննիսյանը:
Մեկնաբանություններ (2)
Մեկնաբանել