Հայաստանում գործող 17 առևտրային բանկերը հրապարակել են 2019 թվականի առաջին եռամսյակի միջանկյալ ֆինանսական հաշվետվությունները, որոնցում առկա տվյալները ցույց են տալիս, որ բանկային համակարգի զուտ շահույթն էականորեն կրճատվել է։

«Հետքն» ուսումնասիրել է բանկերի այս տարվա առաջին եռամսյակի հաշվետվությունները։ Ըստ դրանց՝ այս տարվա առաջին երեք ամիսներին բանկային համակարգի զուտ շահույթը կազմել է  16 մլրդ 92 մլն դրամ՝ 2018 թվականի առաջին եռամսյակի մոտ 20 մլրդ 229 մլն դրամի դիմաց։ Այդպիսով, բանկերի զուտ շահույթն այս տարվա առաջին եռամսյակում նախորդ տարվա նույն ժամանակաշրջանի համեմատ կրճատվել է 4.1 մլրդ դրամով կամ 20.4%-ով։

Չնայած շահույթի նվազմանը՝  պետք է նշել, որ բանկերից և ոչ մեկն առաջին եռամսյակը վնասով չի փակել։

Շահույթի անկում է գրանցել է 17 բանկերից 11-ը։ Ամենամեծ զուտ շահույթը ստացել է «Ամերիաբանկը»։ Բանկի զուտ շահույթը կազմել է մոտ 3.1 մլրդ դրամ՝ նախորդ տարվա նույն ժամանակաշրջանի համեմատ աճելով մոտ 536 մլն դրամով կամ 20.9%-ով։

Շահույթի չափով երկրորդ տեղում «Արդշինբանկն» է, որի զուտ շահույթն առաջին եռամսյակում կազմել է 2.2 մլրդ դրամ՝ նախորդ տարվա նույն ժամանակաշրջանի համեմատ աճելով 40.5 մլն դրամով կամ  1.8%-ով։

Եռյակը եզրափակում է «Ինեկոբանկը», որի շահույթ կրճատվել է նախորդ տարվա համեմատ։ Առաջին եռամսյակում բանկի զուտ շահույթը կազմել է շուրջ 1.8 մլրդ դրամ՝ նվազելով 255 մլն դրամով կամ 12.5% -ով։

Բացի «Ամերիաբանկ»-ից և «Արդշինբանկ»-ից՝ շահույթի աճ են գրանցել նաև «Կոնվերս բանկը», «Բիբլոս բանկ Արմենիան», «Մելլաթ բանկն» ու «Հայէկոնոմբանկը»։

Բանկերի շահույթների մասին տվյալների համեմատությունը ցույց է տալիս, որ այս տարվա առաջին եռամսյակում հայաստանյան բանկերի կազմում բացարձակ թվով զուտ շահույթի ամենամեծ աճը գրանցել է «Ամերիաբանկը»։

Իսկ ամենամեծ անկումը «ԱԿԲԱ-Կրեդիտ Ագրիկոլ բանկ»-ինն է։ Նշված բանկի զուտ շահույթն այս տարվա առաջին եռամսյակում կազմել է մոտ 584 մլն դրամ՝ նախորդ տարվա նույն ժամանակաշրջանի մոտ 2.2 մլրդ դրամի դիմաց։ Այսինքն՝ նշված բանկի զուտ շահույթը նվազել է 1.57 մլրդ դրամով կամ 3.7 անգամ։

Զգալի է նաև «Արցախբանկի» շահույթի նվազումը։ Բանկի զուտ շահույթն այս տարվա առաջին եռամսյակում կազմել է շուրջ 1.7 մլրդ դրամ՝ նախորդ տարվա նույն ժամանակաշրջանի համեմատ նվազելով 1.1 մլրդ դրամով կամ 40.8%-ով։

Բանկային համակարգում շահույթի նվազմանը զուգահեռ մի շարք այլ ցուցանիշների գծով աճ է արձանագրվել այս տարի, ինչպիսիք են վարկերն ու ավանդները, որոնց առաջիկայում կանդրադառնանք։ Ինչ վերաբերում է շահույթի նվազման պատճառներին, ապա ֆինանսական հաշվետվությունների հիման վրա կարելի է որոշ եզրահանգումների գալ։ Օրինակ՝ մի բանկի դեպքում դա պայմանավորված է անհուսալի վարկերի դուրս գրումով, մյուսի դեպքում՝ անցած տարի գրավադրված գույքի վաճառքի գործարքներով և այլն։ Հաջորդ հրապարակմամբ կներկայացնենք փորձագետի մեկնաբանություններն այդ մասին։