Ուկրաինայի Գերագույն Ռադայի պատգամավոր Մուստաֆա Նայեմը հայտարարել է, թե ապրիլի 30-ին «Զվարթնոց» օդանավակայանի անձնագրերի հսկիչ կետում իրեն արգելել են մուտք գործել Հայաստան՝ Ռուսաստանի պահանջով:

«Մինչև մենք Կիևում չենք կարողանում կողմնորոշվել և համապատասխանեցնել Ռուսաստանի դեմ պատժամիջոցները ԱՄՆ-ի և Եվրամիության հետ, Մոսկվան արդյունավետորեն պարտադրում է իր արգելքները ԱՊՀ երկրներին:

Արևելաեվրոպական կենտրոնի հրավերով երեկ երեկոյան ժամանեցի Երևան հակակոռուպցիոն մարմինների մեծ համաժողովին ելույթ ունենալու համար: Անձնագրերի հսկիչ կետում տրամադրեցի սովորական անձնագիր, քանի որ ուղևորությունը ծառայողական չէ, իսկ ես չեմ սիրում չարաշահել դիվանագիտական անձնագիրը: Երկարատև ստուգումից հետո սպաները ինձ հայտնեցին, որ տվյալների բազայում նշված է «արգելք մուտքի վրա»: Խնդրեցի բացատրել պատճառը, ասացին, որ հայտնի չէ և չեն կարող ասել. «պարզապես ոչ ցանկալի անձ»,- ֆեյսբուքյան իր էջում գրել է ուկրաինացի պատգամավորը:

Մուստաֆա Նայեմի խոսքով՝ անձնագրային հսկիչ կետի աշխատակիցները փորձել են պարզել իրենից՝ նախկինում այսպիսի անախորժություններ ունեցե՞լ է այլ երկրներում, թե՞ ոչ, ինչին պատգամավորը բացասական պատասխան է տվել` ընգծելով, որ իր անձնագրում ամերիկյան, բրիտանական, կանադական և նորվեգական վիզաներ կան, բազմաթիվ կնիքներ՝ սահմանը հատելու մասին, և ոչ մի անգամ խնդիր չի եղել:

«Որոշ ժամանակ անց եկան միգրացիոն ծառայության երկու աշխատակիցներ և քաղաքավարի բացատրեցին, որ արգելքը ոչ թե Հայաստանի կողմից է, այլ «երրորդ երկրի պահանջով»: «Ես այսպիսի այլ երկիր չգիտեմ»,- մտածեցի ես, և ինչպես պարզվեց, ճիշտ էի. Հայաստանում այսպիսի բան մեր քաղաքացիների հետ եղել է: Արգելքներ են դրվում Ռուսաստանի Դաշնության պահանջով՝ Հայաստանի սահմանապահ զորքերի բազայի՝ Ռուսաստանի պատժամիոցների ցանկին համապատասխանեցնելու շրջանակներում»,- նշել է Մուստաֆա Նայեմը:

Ուկրաինացի պատգամավորի խոսքով՝ բոլոր հանգամանքները պարզելուց, և իր պատկերացմամբ՝ Ուկրաինայի ծառայությունների միջամտությունից հետո իրեն վերջիվերջո թույլատրել են մուտք գործել՝ «մեկանգամյա» նշումով:

«Մեր հյուպատոսական ծառայությունը խորհուրդ է տվել իմ շարժի մասին տեղյակ պահել դեսպանությանը և այցի ավարտից հետո օդանավակայան գնալ դեսպանի կամ հյուպատոսի ուղեկցությամբ»,- ասել է Մուստաֆա Նայեմը:

Իր գրառման մեջ պատգամավորը նաև ափսոսանք է հայտնել, որ թավշյա հեղափոխությունից հետո Հայաստանը շարունակում է կախում ունենալ Ռուսաստանից: