Փաշինյանն ու Ալիեւը փոխադարձ մեղադրանքներ են հնչեցրել սահմանային լարվածության կապակցությամբ
Ադրբեջանը վերջին 25 տարում ինտենսիվորեն պատրաստվում է պատերազմի։ Այսպես արձագանքեց վարչապետ Նիկոլ Փաշինյանը՝ հարցին, թե արդյոք վերջին շրջանում հայ-ադրբեջանական սահմանի լարվածությունը կարո՞ղ է ազդակ լինել, որ Ադրբեջանը պատրաստվում է պատերազմի։
«Մենք կրակոցներ ենք ունենում ամենօրյա ռեժիմով, էական չէ՝ շատ թե քիչ, նշանակում է՝ մենք պատերազմական կամ կիսապատերազմական վիճակի մեջ ենք»,- ասաց Փաշինյանը։
Փաշինյանի խոսքով՝ ընդհանուր առմամբ վերջին սահմանային միջադեպերի որոշակի լարվածություն է նկատվում:
«Բայց ես ուզում եմ ասել, որ կայունությունը ու հանդարտությունը որ կար, պահպանվում է»,- ասաց նա։
Նիկոլ Փաշինյանի խոսքով՝ նա շարունակում է կապ պահպանել Ադրբեջանի նախագահի հետ, և վերջին դեպքերից հետո փոխադարձ մեղադրանքներ են հնչել։
«Ես հույս ունեմ, որ մեզ կհաջողվի այս իրավիճակը հասկանալ, թե ինչ է կատարվում ու ինչու է կատարվում. ես մեր վիրավոր զինվորներին մաղթում եմ շուտափույթ ապաքինում»,- ասաց նա։
Հիշեցնենք, որ ՊԲ ժամկետային զինծառայող Ագանիկ Զորոգլյանը հակառակորդի կրակոցից վիրավորվել է մայիսի չորսին, նրա վիճակը գնահատվում է ծայրահեղ ծանր, իսկ ապրիլի 30-ին վիրավորում ստացած պայմանագրային զինծառայող Արգիշտի Սեփխանյանի առողջական վիճակը գնահատվում է կայուն ծանր՝ դրական դինամիկայով։
Նիկոլ Փաշինյանն ասաց՝ պետք է հասկանալ, թե կողմերից որ մեկն է հրաման տվել՝ ապակայունացնելու իրավիճակը:
«Չնայած ես դա չէի անվանի ապակայունացում, որոշակի օրերի միջադեպեր են արձանագրվում, ադրբեջանական կողմը որոշակի ինֆորմացիա է փոխանցում մեզ, որ իրենց մոտ էլ կան դեպքեր, մտահոգություններ, մենք պետք է աշխատանքային կարգով փորձենք հասկանալ»,- ասաց նա։
Մեկնաբանել