HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Հերգնյան

Բանկերն առաջին եռամսյակում. վարկերի աճը՝ 2%

Այս տարվա առաջին եռամսյակի վերջի դրությամբ Հայաատանի առևտրային բանկերի կողմից հաճախորդներին տրամադրված վարկերի ընդհանուր ծավալը կազմել է մոտ 3 տրլն 127 մլրդ դրամ։ Այս մասին են վկայում գործող 17 առևտրային բանկերի առաջին եռամսյակի միջանկյալ ֆինանսական հաշվետվությունները։

«Հետք»-ի հաշվարկներով՝ այս երեք ամսում, այսինքն՝ 2018 թվականի վերջի համեմատ, բանկերի վարկային պորտֆելն աճել է 62.2 մլրդ դրամով կամ 2 %-ով։

Վարկային պորտֆելի մեծությամբ Հայաստանում առաջատարը «Ամերիաբանկն» է։ Մարտի վերջի դրությամբ նշված բանկի կողմից տրամադրված վարկերի ծավալը կազմել է 537.1 մլրդ դրամ, որը 2018-ի դեկտեմբերի վերջին գրանցված ցուցանիշի համեմատ կրճատվել է շուրջ 11 մլրդ դրամով կամ շուրջ 2 %-ով։

Վարկերի ծավալով երկրորդ տեղում «Հայբիզնեսբանկն» է՝ 462 մլրդ դրամով։ Բանկի վարկային պորտֆելը նախորդ տարեվերջի համեմատ աճել է շուրջ 24 մլրդ դրամով կամ 5.4 %-ով։

Եռյակը եզրափակում է Արդշինբանկը՝ մոտ 453 մլրդ դրամով։ Բանկի վարկային պորտֆելը կրճատվել է 4 մլրդ դրամով կամ մոտ 0.9 %-ով։

Ամենաշատ վարկ տրամադրող բանկերի առաջին հնգյակում են նաև «ԱԿԲԱ-Կրեդիտ Ագրիկոլ բանկն» ու «Ինեկոբանկը»։

Նրանց հաջորդում են «Կոնվերս բանկը», «ՎՏԲ-Հայաստան բանկը», «Հայէկոնոմբանկը», «Յունիբանկն» ու «Արարատբանկը»։

Բանկերի վարկերի ծավալներն այս տարվա առաջին եռամսյակի վերջի (31/03/19) և նախորդ տարվա վերջի (31/12/18) դրությամբ ներկայացված են ստորև գտնվող ինֆոգրաֆիկայում։ Ցուցանիշներն, ինչպես նշեցինք, վերցված են բանկերի առաջին եռամսյակի ֆինանսական հաշվետվություններից։

Screen Shot 2019-05-09 at 10.37.01.png (294 KB)
Աղբյուրը՝ բանկերի առաջին եռամսյակի միջանկյալ ֆինանսական հաշվետվությունները

Ինչպես տեսնում եք, բացարձակ մեծությամբ վարկային պորտֆելի ամենամեծ աճը գրանցել է «Հայբիզնեսբանկը»՝ 24 մլրդ դրամով ավելացնելով այն։

Ընդհանուր առմամբ, 17 առևտրային բանկերից 6-ի վարկային պորտֆելը նվազել է , 11-ինը՝ աճել։ Բացարձակ թվով ամենամեծ անկումը գրանցել է «Ամերիաբանկը»՝ շուրջ 11 մլրդ դրամով։

Բանկերի ֆինանսական հաշվետվությունները նաև վկայում են, որ այս տարվա առաջին եռամսյակում նվազել է նրանց շահույթը։ Ինչպես ավելի վաղ գրել ենք, առաջին երեք ամիսներին բանկային համակարգի զուտ շահույթը կազմել է 16 մլրդ 92 մլն դրամ՝ 2018 թվականի առաջին եռամսյակի մոտ 20 մլրդ 229 մլն դրամի դիմաց։ Այդպիսով, բանկերի զուտ շահույթն այս տարվա առաջին եռամսյակում նախորդ տարվա նույն ժամանակաշրջանի համեմատ կրճատվել է 413.7 մլն դրամով կամ 20.4 %-ով։ Շահույթի անկում է գրանցել է 17 բանկերից 11-ը։  Չնայած շահույթի նվազմանը՝ բանկերից և ոչ մեկն առաջին եռամսյակը վնասով չի փակել։

Արտարժույթով վարկերը գերակշռում են

Հայաստանյան բանկերը շարունակում են ավելի շատ արտարժույթով վարկեր տրամադրել, քան ՀՀ դրամով։ Թեև պետք է նկատել, որ վերջին երկու տարիներին արտարժույթով վարկերի տեսակարար կշիռը համեմատաբար փոքրացել է։

Կենտրոնական բանկի հրապարակած տվյալների համաձայն՝ այս տարվա մարտի վերջի դրությամբ բանկերի կողմից տրամադրվող վարկերի ընդհանուր ծավալը կազմել է 3 տրլն 200 մլրդ դրամ։ Այստեղ ներառված են ինչպես հաճախորդներին՝ տնային տնտեսություններին, այնպես էլ՝ ֆինանսական կազմակերպություններին տրամադրված վարկերը (հաշվետվությունների հիման վրա մեր ստացած ցուցանիշում ֆինանսական կազմակերպություններին տրամադրվող վարկերը ներառված չեն):

Կենտրոնական բանկի տվյալներով՝ մարտի վերջի դրությամբ բանկերի վարկերի կազմում արտարժույթով վարկերի ծավալը կազմել է մոտ 1 տրլն 75 մլրդ դրամ, որը կազմում է ամբողջ վարկային պորտֆելի 54.7 %-ը։

Արտարժույթով վարկեր ասելով՝ պետք է նկատի ունենալ հիմնականում դոլարային վարկերը։

Իսկ դրամով վարկերի ծավալը կազմել է 1 տրլն 450 մլրդ դրամ, որն էլ զբաղեցրել է ամբողջ վարկային պորտֆելի 45.3 %-ը։

Հայաստանի բանկերի վարկային պորտֆելում այսօր շարունակում են ամենամեծ տեսակարար կշիռն ունենալ սպառողական վարկերը։ Հաջորդում են արդյունաբերության և առևտրի ոլորտներին տրվող վարկերը։ 

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։