Պետական գույքի կառավարման կոմիտեին ամրացված, Երևանի Նազարբեկյան 48 հասցեում գտնվող անավարտ բնակելի շենքի բնակարանը որպես նվիրատվություն կփոխանցվի այնտեղ բնակվող ընտանիքին։ Նման որոշում ընդունվեց կառավարության այսօրվա նիստին։

Տնտեսական զարգացման և ներդրումների նախարարության փոխանցմամբ՝ կառավարության 2012, 2015, 2017 թվականների որոշումներով՝ Նազարբեկյան 48 հասցեում բնակվող 17 ընտանիքի կառավարությունը նվիրաբերել է իրենց զբաղեցրած բնակարանները։

Սակայն այս ընտանիքի անդամները չեն ներառվել այդ որոշումների ցանկում՝ պահանջվող փաստաթղթերը Պետական գույքի կառավարման կոմիտե թերի ներկայացնելու հետևանքով։

Գործադիրի փոխանցմամբ՝ այդ ընտանիքին հանձնվող բնակարանի հարցով լուծվում է այդ շենքում բնակվող ընտանիքներին հատկացվող բնակարանների խնդիրն ամբողջությամբ։

Նշենք, որ տարիներ շարունակ Պետական գույքի կառավարման կոմիտեն և Երևանի քաղաքապետարանը հստակ տեղեկատվություն չէին փոխանցում, թե ում հաշվեկշռում է գտնվում Նազարբեկյան 48 շենքը։ Բնակիչները 90-ականներին եկել էին այս շենք և ինքնակամ բնակություն հաստատել։ Նրանց զբաղեցրած բնակարանները կառավարությունը մի քանի որոշումներով փոխանցեց նրանց, որպեսզի նրանք ևս մասնակցեն ընդհանուր օգտագործման տարածքների ամրացմանն ու բարեկարգմանը։