«Դատաիրավական ծրագրերի իրականացման գրասենյակ»-ի գործունեությունը կդադարեցվի
Կառավարությունն այսօրվա հերթական նիստին որոշեց հունիսի 15-ից դադարեցնել Արդարադատության նախարարության «Դատաիրավական ծրագրերի իրականացման գրասենյակ» պետական հիմնարկի գործունեությունը: Այդ նպատակով մինչև հունիսի 1-ը կստեղծվի լուծարման հանձնաժողով։
Արդարադատության նախարարության հաղորդմամբ՝ «Դատաիրավական ծրագրերի իրականացման գրասենյակ» պետական հիմնարկը լուծարվում է՝ հաշվի առնելով նոր ծրագրերի բացակայությունը, ինչպես նաև վարչապետի 2018 թվականի դեկտեմբերի 17-ի հանձնարարականը։ Նշենք, որ վարչապետը պետական կառավարման համակարգի ղեկավարներին հանձնարարեց ներկայացնել իրենց հսկողության տակ գործող ծրագրերի իրականացման գրասենյակների հետագա օպտիմալացման և դրանց գործառույթները նախարարության կառուցվածքային ստորաբաժանումների միջոցով իրականացնելու առաջարկություններ։
Հիմնարկի գործունեության հիմնական նպատակը արդարադատության և դատաիրավական ոլորտում կառավարության կողմից հավանության արժանացած և արդարադատության նախարարության ու տարածքային կառավարման մարմինների կողմից մշակված դատաիրավական համակարգի և օտարերկրյա պետությունների, միջազգային վարկատու կազմակերպությունների կողմից Հայաստանին տրամադրվող միջոցների հաշվին մշակված նպատակային ծրագրերի ու աշխատանքների իրականացման ապահովումն է:
Լուծարվող «Դատաիրավական ծրագրերի իրականացման գրասենյակ»-ի գործառույթները կիրականացնեն Արդարադատության նախարարության կառուցվածքային ստորաբաժանումները։
Մեկնաբանել