Առողջապահության նախարարությունն առաջարկում է առողջապահության նախարարի առաջադրած ներկայացուցչին ևս ներգրավվել զորակոչի կենտրոնական բժշկական հանձնաժողովի (ԿԲՀ) կազմում: Նշենք, որ ԿԲՀ-ն հանդիսանում է զորակոչիկների առողջական վիճակի վերաբերյալ վերջնական եզրակացություն տվող մարմին:

 

Առողջապահության նախարարությունը նման նախագիծ է քննարկման ներկայացրել իրավական ակտերի նախագծերի հրապարակման միասնական կայքում:

 

Նախարարության հաղորդմամբ՝ կենտրոնական բժշկական հանձնաժողովի կազմում իրենց ներկայացուցչի չներգրավվածությունը խնդրահարույց է, քանի որ զորակոչի ողջ գործընթացում նախարարությանը վերապահված գործառույթները լիարժեք և արդյունավետ չեն իրականացվի: Բացի այդ, հաճախ հանձնաժողովը պարզաբանումներ ստանալու գրություններ է ուղարկում նախարարության խորհրդատուներին, ինչը նույնպես օրենսդրությամբ կարգավորված չէ:

 

«Առողջապահության նախարարի կողմից առաջադրված թեկնածուի ներկայությունը հանձնաժողովում հնարավորություն կտա նաև ուսումնասիրել և վեր հանել զորակոչի գործընթացում առողջապահության ոլորտին վերաբերելի խնդիրները, օպերատիվ կարգով լուծումներ առաջադրել այդ խնդիրներին և արդյունավետ կերպով համակարգել ԿԲՀ-ի կողմից բժշկական հաստատություններ ուղարկված զորակոչիկների բժշկական հետազոտման և բուժման գործընթացը»,-նշել է նախարարությունը:

 

Ըստ առողջապահության նախարարության՝ իրենց ներկայացուցչի ներգրավվածությունը թույլ կտա մշտադիտարկել տարածքային զինվորական կոմիսարիատների բժշկական հանձնաժողովների տված առողջական վիճակի մասին եզրակացությունների որակը, կբարձրացնի զորակոչիկների առողջական վիճակի վերաբերյալ ԿԲՀ-ի տված եզրակացությունների որակ, ինչպես նաև առավել թափանցիկ և արդյունավետ կդարձնի զորակոչիկների բժշկական հետազոտումը և փորձաքննությունը: