Պատգամավորի գնահատմամբ՝ Հայաստանում անկախ դատական համակարգ գոյություն չունի
«Իմ քայլը» խմբակցության պատգամավոր Մարիա Կարապետյանը դատարանների նկատմամբ ճնշում չի համարում վարչապետի՝ դատարանների մուտքը փակելու կոչը: Նա առավոտյան Վճռաբեկ դատարանի դիմաց էր, որտեղ մի խումբ քաղաքացիներ փակել էին դատարանի մուտքը:
Պատգամավորը «Հետք»-ի հետ զրույցում ասաց՝ նախ պետք է արձանագրել, որ Հայաստանում կա դատական իշխանություն, այսինքն՝ անկախ մի ճյուղ, որն իրենց հետ հավասարազոր կիսում է պատասխանատվությունը երկրում ստեղծված իրավիճակի համար, հետո դատողություն կատարենք միջամտության մասին:
Վերջինս պնդեց, որ այս ակցիան չի խաթարելու դատարանների գործունեությունը: «Ինչպե՞ս խաթարել մի բան, որը չկա: Մի քիչ դժվար է խաթարել մի դատական իշխանություն, որում անիշխանություն է»,- նշեց նա:
Մարիա Կարապետյանը ռադիկալ չի համարում դատարանների մուտքերը փակելու քայլը, ասում է՝ մեկը մյուսին չի խանգարում, իրենք անպայման օրենսդիրի միջոցով բարեփոխելու են դատական իշխանությունը, ստեղծելու են անկախ դատական համակարգ:
Պատգամավորը կարծում է՝ Հայաստանում անկախ դատական համակարգ գոյություն չունի: «Չկա: Ես չեմ տեսնում մի դատական համակարգ, որը կարողացել է փակել այն անվստահության անդունդը, որը կա իր և հասարակության միջև: Ես այդ անդունդը կամրջելու հնարավորություն չունեմ, որովհետև այն պահին, երբ ես որևէ բան եմ ասում դատական իշխանության մասին, ուրեմն խնդիր է: Ո՞վ պետք է այդ անդունդը կամրջի»,-ասաց պատգամավորը:
Դիտարկմանը, թե իշխանությունը մեկ տարի ժամանակ ուներ դատական համակարգը բարեփոխելու համար, Կարապետյանը մեկ տարին փոքր-ինչ չափազանցված համարեց: Ըստ նրա` լեգիտիմ օրենսդիր իշխանություն ձևավորվել է դեկտեմբերի 9-ին, որն իր աշխատանքները սկսել է հունվարի 14-ից: «Հունվարի 14-ից առ այսօր բարեփոխումների մասին շատ քննարկումներ են եղել: Գիտեք` անցումային արդարադատության կոնցեպտը կա, որը գրված է եղել մեր նախընտրական ծրագրում, հետո քննարկում եղավ, որ կառավարությունը չի միջամտի, կթողնի, որպեսզի օրենսդիրներով ավելի լայն կոնսենսուսով այդ խնդիրը քննարկենք: Այս ողջ գործընթացում իշխանության այդ երրորդ ճյուղի ներկայությունը, որևիցե ջանք ես չեմ տեսնում՝ իրենց համբավը վերականգնելու»,-նշեց նա:
Պատգամավորին մտահոգում է այն, որ դատական իշխանության բարեփոխման վերաբերյալ քննարկումներ են ունեցել քաղաքացիական հասարակության, ոլորտի մասնագետների հետ, սակայն դատական իշխանությունից առաջարկներ, բարեփոխումներին առնչվող կարծիքներ չեն լսել: «Ինքը սպասում է, մինչ գան և բարեփոխե՞ն իրեն»,- հարցրեց պատգամավորը:
Մարիա Կարապետյանի գնահատմամբ՝ դատական իշխանության նկատմամբ անվստահությունը վստահության կասկածներ է առաջացնում նաև օրենսդիրի և գործադիրի գործունեության վերաբերյալ: «Այսինքն՝ մյուս ճյուղերի նկատմամբ վստահությունը նույնպես խաթարվում է՝ այս երրորդ ճյուղի` իր մանդատը չկատարելու պատճառով»,- նշեց պատգամավորը:
Մեկնաբանել