Կառավարությունն այսօրվա նիստին որոշեց պաշտպանության նախարարությանն ամրացված և օպտիմալացման արդյունքում այլևս չգործող զինվորական կոմիսարիատի տարածքից 2000 քմ տարածք հատկացնել Մուշեղ Մխոյանի անվան թիվ 68 հիմնական դպրոցին:

Դրա հաշվին գործադիրը պատրաստվում է ընդլայնել դպրոցին հատկացվող տարածքը։

Կատարված փորձաքննության եզրակացությամբ՝ դպրոցի ներկայիս շենքը ամրացման ենթակա չէ, և նախատեսվում է կառուցել նոր դպրոց՝ 648 աշակերտի համար: «Սակայն, գործող քաղաքաշինական նորմերի համաձայն, առկա տարածքը չի բավարարում այդ ցուցանիշներին և ծրագրի փորձագետների կողմից տեղում իրականացված դիտարկումների արդյունքում պարզ է դարձել, որ տարածքը հնարավոր է ընդլայնել հարևանությամբ գտնվող, օպտիմալացման արդյունքում այլևս չգործող զինվորական կոմիսարիատի տարածքի հաշվին»,- կառավարությանը հայտնել է Տարածքային կառավարման և զարգացման նախարարությունը:

Հիշեցնենք, որ կառավարության և Ասիական զարգացման բանկի միջև իրականացվող սեյսմիկ անվտանգության բարելավման վարկային ծրագրի շրջանակներում նախատեսվում է իրականացնել առաջնահերթ կարգով հանրապետության սեյսմիկ անվտանգության տեսանկյունից առավել վտանգավոր 46 դպրոցների ամրացման կամ նորի կառուցման աշխատանքներ։

Լուսանկարը՝ Մուշեղ Մխոյանի անվան դպրոցի ֆեյսբուքյան էջից