Այս պահին 1133 փաստաբան ունեցող Փաստաբանների պալատը միայն 2011 թվականին փաստաբանների նկատմամբ շուրջ 40 կարգապահական վարույթ է հարուցել, որից ավարտվել է 33-ը: Փաստաբանների նկատմամբ կարգապահական վարույթ հարուցելու կարգ թեև մինչ օրս էլ ունեցել ենք, նախորդ տարեվերջին «Փաստաբանության մասին» օրենքում կատարված փոփոխությունների արդյունքում այս պահին ՓՊ-ն փաստաբանների ուշադրությանն է ներկայացրել կարգապահական վարույթի վերաբերյալ նոր նախագիծ, և ընդհանրապես Պալատում այս տարի նախատեսում են կյանքի կոչել նախորդ տարեվերջին «Փաստաբանների մասին» օրենքում կատարված փոփոխությունները:

Նաև օրենքում կատարված փոփոխություններին և դրանց համարժեք փաստաբանների քայլերին է մտադիր անդրադառնալ փետրվարի 11-ին տեղի ունենալիք Փաստաբանների պալատի (ՓՊ) ընդհանուր ժողովը: Փաստաբանների պալատը հույս ունի կատարված օրենսդրական փոփոխությունների միջոցով բարձրացնել փաստաբանության որակը Հայաստանում:

Ինչպես հիշում ենք, համաձայն օրենքի՝ եթե 2 տարվա ընթացքում փաստաբանը այդ 48-ժամյա վերապատրաստումը չանցնի, կարող է ենթարկվել կարգապահական պատասխանատվության, ընդ որում՝ փաստաբանը վերապատրաստում պետք է անցնի իր ֆինանսական միջոցների հաշվին: Բացի դրանից՝ փաստաբանի արտոնագրումն այսուհետ լինելու է փաստաբանական դպրոցում սովորելու միջոցով:

Եթե առաջ մարդը կարող էր ունենալ 2 տարվա աշխատանքային ստաժ, քննություններ հանձնել և արտոնագիր ստանալ, ապա այսօր արդեն բուհն ավարտած ուսանողը պետք է ընդունվի դպրոց՝ վճարովի հիմունքներով, հանձնի որակավորման քննություններ և ստանա արտոնագիր: Դպրոցում, որն այս տարվա ընթացքում պետք է կառուցվի, ապագա փաստաբանը 6 ամիս կյուրացնի փաստաբանական հմտությունները, այնուհետև փորձառու փաստաբանի մոտ փորձաշրջան կանցնի 1 տարվա ընթացքում և հետո միայն կհանձնի որակավորման քննություն: Այս ամենից հետո միայն արժանի փաստաբանը արտոնագիր կստանա:

Ինչ վերաբերում է որակավորման հանձնաժողովի ձևավորմանը, ապա դրա իրավասությունը դպրոցին չի հանձնվելու, այլ՝ Փաստաբանների պալատին: