Լեռնային Ղարաբաղի իշխանությունները ԼՂ բանակցությունների վերաբերյալ նախկինում որևէ տեղեկատվության չեն տիրապետել։

Այս մասին խորհրդարանում՝ լրագրողների հետ զրույցում ասաց վարչապետ Նիկոլ Փաշինյանը։

«ԼՂ ղեկավարության և ռազմաքաղաքական ղեկավարության հետ մի քանի անգամ հանդիպել եմ և ներկայացրել ԼՂ հարցի լուծման վերաբերյալ իմ տեսլականը և հետաքրքրվել եմ` իմ առաջադրած տեսլականի հետ կապված պրետենզիաներ կա՞ն, թե չէ։ Պարզվեց, որ բոլորը համաձայն են, և երբ դրանից հետո սեղանի շուրջ ներկա մարդիկ հրահրում են` տակից ասելով, որ այս կառավարությունը հողեր է ծախում, հարց է ծագում, որ էս մարդու հետ խոսել եմ գաղտնիության պայմաններում, և էդ մարդը հանդիպումից դուրս է գալիս ու օգնականին ասում` ֆեյսբուքում գրի, որ Փաշինյանը հողեր է ծախում, ինչի՞ համար է անում այդ հայտարարությունը»,-ասաց Փաշինյանը՝ ի պատասխան այն հարցի, թե որոնք են այն դավադիր ուժերը (Փաշինյանի գնահատականն է, որ տվել էր իր վերջին ասուլիսում), որոնք պնդում են, թե իշխանությունը փորձում է հողեր ծախել։

Փաշինյանը վստահեցրեց՝ ղարաբաղյան իշխանությունները նախկինում բանակցություններից տեղյակ չեն եղել։

«Երբ Հայաստանում իշխանության ղեկին է եղել իր պարի ընկերը, ինքը ոչ մի ինֆորմացիա չի ունեցել, հարկ չեն համարել տեղյալ պահել, թե ինչ է կատարվում, ինչ են մտածում։ Ես եմ Ղարաբաղի հարցի բանակցային պրոցեսի վերաբերյալ փաստաթղթեր տվել ԼՂ իշխանություններին, նրանք դրանից առաջ տեղյակ չեն եղել, թե ինչ է բանակցվել ինձնից առաջ։ Եվ նրանք դրանից հետո օգնականների էջերով, երբեմն էլ իրենք գրում են` ապազգային այս իշխանությունը, դա ինչի՞ համար են անում»,- հարցրեց վարչապետը։