Կառավարությունն այսօրվա նիստին որոշեց մոտ 117 միլիոն դրամ հատկացնել «Մխիթար Սեբաստացի» կրթահամալիրին՝ «Նորարարական մանկավարժական ծրագրերի իրականացում հանրակրթությունում» միջոցառման շրջանակներում։

Կրթության, գիտության, մշակույթի և սպորտի նախարարության հաղորդմամբ՝ «Մխիթար Սեբաստացի»-ի ընտրությունը պայմանավորված է այս ծրագրում կրթահամալիրի եզակի գործառույթների իրականացմամբ։

Ըստ նախարարության, բյուջեից հանրակրթական ծրագրերի իրականացման օժանդակության շրջանակներում «Մխիթար Սեբաստացի» կրթահամալիրում իրականացվում է պետական այլընտրանքային (հեղինակային) մանկավարժության, կրթահամալիրի կրտսեր-դպրոց պարտեզներում՝ նախադպրոցական ուսուցման ծրագրեր:

«Հեղինակային կրթական ծրագրի կազմակերպման, տարածման համար կրթահամալիրը ստեղծում է կապեր պետական, հասարակական, միջազգային կազմակերպությունների, անձանց հետ, որոնք աջակցում են ծրագրի կազմակերպման տարբեր խնդիրների լուծմանը»,- հայտնել է նախարարությունը:

Այս տարվա պետական բյուջեից «Նորարարական մանկավարժական ծրագրերի իրականացում հանրակրթությունում» ծրագրով նախատեսված է եղել մինչև սեպտեմբեր մոտ 68 միլիոն դրամ տրամադրել «Մխիթար Սեբաստացի» կրթահամալիրին, իսկ հաջորդ ուսումնական տարվա սկզբից մոտ 50 միլիոն դրամ տրամադրել դրամաշնորհային մրցույթով հաղթած կազմակերպությանը: Սակայն ելնելով այն հանգամանքից, որ կրթահամալիրը հանդիսանում է «Նորարարական մանկավարժական ծրագրերի իրականացում հանրակրթությունում. հեղինակային կրթական ծրագրերի մշակում և իրականացում՝ անհատի օժտվածության զարգացման բաց համակարգ՝ ստեղծագործ անհատի կրթական պատվերի իրականացում» ծրագրի հեղինակ, պետբյուջեի «Նորարարական մանկավարժական ծրագրերի իրականացում հանրակրթությունում» ծրագրով նախատեսված միջոցներն էլ հատկացվեցին կրթահամալիրին: Այսինքն՝ կառավարությունն ընդհանուր առմամբ մոտ 117 միլիոն դրամ կտրամադրի կրթահամալիրին՝ այս գործառույթներն իրականացնելու համար: