Վերաքննիչ քրեական դատարանի դատավոր Արմեն Դանիելյանը քիչ առաջ մերժեց երկրորդ նախագահ Ռոբերտ Քոչարյանի գործով իրեն ներկայացված ինքնաբացարկի միջնորդությունները: Որոշում կայացնելու համար Դանիելյանը խորհրդակցական սենյակ էր հեռացել հունիսի 14-ին: Այսպիսով, գործով ներկայացված բողոքները կշարունակի քննել Արմեն Դանիելյանը:

Նշենք, որ դատավորին տարբեր հիմքերով ինքնաբացարկի միջնորդություններ են ներկայացրել Քոչարյանի, ՊՆ նախկին նախարար Սեյրան Օհանյանի, ՀԱՊԿ նախկին գլխավոր քարտուղար Յուրի Խաչատուրովի պաշտպանները, տուժողի ներկայացուցիչ, փաստաբան Սեդա Սաֆարյանը:

Հիշեցնենք, որ Վերաքննիչ քրեական դատարանը՝ նախագահությամբ դատավոր Արմեն Դանիելյանի, հունիսի 12-ից քննում է Քոչարյանի խափանման միջոց կալանքն անձնական երաշխավորությամբ փոխելու, նրա մասնակցությամբ Մարտի 1- գործի վարույթը կասեցնելու և Սահմանադրական դատարան դիմելու որոշման դեմ Դատախազության և տուժող կողմի բողոքները: