50 մլն դրամ հատկացվեց Տիգրան Մանսուրյանի 80-ամյակի միջոցառմանը
Տիգրան Մանսուրյանի ծննդյան 80-ամյակին նվիրված միջազգային փառատոնի իրականացման նպատակով «Հայաստանի պետական սիմֆոնիկ նվագախումբ» ՊՈԱԿ-ին, որպես դրամաշնորհ, կտրամադրվի 50 միլիոն դրամ: Նման որոշում այսօրվա նիստին կայացրեց Կառավարությունը:
Կրթության, գիտության, մշակույթի և սպորտի նախարար Արայիկ Հարությունյանը Կառավարության անդամներին հայտնեց, որ փառատոնն անցկացվելու է սեպտեմբերի առաջին կեսին: Դրան մասնակցելու են այն երաժիշտները, որոնք արտերկրում ներկայացնում են Մանսուրյանի արվեստը: Ըստ նախարարի՝ համերգները տեղի են ունենալու Ստեփանակերտում, Երևանում և Գյումրիում:
Կրթության, գիտության, մշակույթի և սպորտի նախարարության հաղորդմամբ՝ Տիգրան Մանսուրյանը հայ արդի դասական երաժշտության անվանի ներկայացուցիչներից է, ով առաջիններից է հայ դասական երաժշտություն ներմուծել կոմպոզիցիոն ժամանակակից հնարներ: «Կոմպոզիտորի 80-ամյա հոբելյանին նվիրված միջազգային փառատոնի կազմակերպումը կնպաստի հայ մշակույթի հանրահռչակմանը, ունկնդրին բարձրաճաշակ դասական երաժշտության ներկայացմանը»,- հայտնել է նախարարությունը:
Մեկնաբանել