Երեկ հրավիրած մամուլի ասուլիսում ՀՀ գյուղատնտեսության նախարար Սերգո Կարապետյանը, ներկայացնելով իր ղեկավարած մարմնի 2012 թ. գերակայությունները, անդրադարձավ նաև նախարարության համակարգում գործող սննդամթերքի անվտանգության պետական ծառայությանը:

- Այդ ուղղությամբ մենք շատ մեծ աշխատանքներ ենք տանում, 2009-2011 թթ. բավականին աշխատանքներ են տարվել, հիմնականում դրանք ուղղված են մեր օրենսդրական դաշտը Եվրամիության պահանջներին համապատասխանեցնելուն,- ասաց Ս. Կարապետյանը:

Իսկ հետաքրքիր է` Եվրամիության պահանջների մեջ չի՞ մտնում համակարգում կոռուպցիայի դեմ պայքարը: Պատասխանելով մեր հարցին` արդյոք ստացե՞լ եք ահազանգեր` սննդամթերքի անվտանգության պետական ծառայության կողմից կոպիտ անօրինականության ու կամայականության վերաբերյալ, որոնց դրդապատճառը, կարծում եմ, կարող է միայն կոռուպցիան լինել, նախարարն ասաց.

- Ճիշտն ասած, ես այդպիսի ահազանգեր չեմ ստացել ո՛չ գրավոր, ոչ էլ բանավոր: Լրագրությունից ես մի դեպք գիտեմ` «Արմֆուդ» կազմակերպության հետ կապված, որը վիճարկում էր լաբորատոր անալիզների պատասխանը: Թե ուր հասան` դեռ հայտնի չէ:

Նախարարին հայտնեցինք, որ մեր հարցն այդ կազմակերպությանը չի վերաբերում: Ուշագրավ է, որ պարոն Կարապետյանը չհետաքրքրվեց, թե մեր հարցով ի՞նչ նկատի ունենք: Այդքան սովորակա՞ն են սննդամթերքի անվտանգության պետական ծառայության վերաբերյալ գյուղատնտեսության նախարարին ուղղված նման հարցադրումները` չնայած հավաստմանը, թե այդպիսի ահազանգեր ո՛չ գրավոր, ոչ էլ նույնիսկ բանավոր չի ստացել: Իր առաջին տեղակալ Գրիշա Բաղիյա՞նն էլ ոչինչ չի ասել կամ փոխանցել իրեն:

Ինչո՞վ է պայմանավորված այն հանգամանքը, որ չնայած Հայաստանում գյուղմթերքների արտադրության ծավալների մեծացմանը` բազմաթիվ մթերքների գներ բարձրացել են: Ս. Կարապետյանը փորձեց այս անժխտելի փաստը բացատրել նրանով, որ դա համաշխարհային երևույթ է, արտադրության ծավալների մեծացմանը զուգընթաց, բայց էլ ավելի մեծ չափերով, աճում է նաև բնակչության թիվը. մի քանի տարի հետո մոլորակի բնակչությունը կհասնի 9 միլիարդի:

Լրագրողներից մեկը, սակայն, հիշեցրեց, որ ի տարբերություն մոլորակի բնակչության, Հայաստանի բնակչությունը վերջին 10 տարում նվազել է:

Հայտնվելով տրամաբանական փակուղում` գյուղատնտեսության նախարարը փորձեց խուսանավել` ասելով, թե այդ ցուցանիշները դեռ նախնական են: Մինչդեռ, կարծում ենք, բոլորին էլ պարզ է, որ որքան էլ այդ ցուցանիշները «սրբագրվեն» և, ասենք, ավելացվեն, վերջնական ու նախնական ցուցանիշների տարբերությունն էական չի կարող լինել:

Ըստ Ս. Կարապետյանի` Հայաստանում աճեցվող գյուղմթերքները նիտրատներ չեն պարունակում: Իհարկե, չի կարելի ասել, թե գյուղացիական բոլոր տնտեսությունների կողմից, տարվա բոլոր սեզոնների ընթացքում աճեցվող և բոլոր տեսակի գյուղմթերքները նիտրատներ են պարունակում, բայց բազմաթիվ փաստեր կան մեր երկրում աճեցված գյուղմթերքներում ոչ միայն նիտրատների, այլև թունաքիմիկատների անթույլատրելի քանակությունների առկայության ու հայտնաբերման մասին: Նախարարը ծանոթ չէ՞ այդ փաստերին...

Վերջում գյուղացիական տնտեսությունների համար ուրախալի մի լուր. Ս. Կարապետյանի հավաստմամբ` որևէ մեկն իրավունք չունի նրանցից պարարտանյութի և դիզվառելիքի տեղափոխման համար գումար պահանջելու, այդ ծախսերի հարցը լուծված է:

Արթուր Հովհաննիսյան