Ազգային ժողովում ուրիշի փոխարեն քվեարկելը նորույթ չէ, եւ այդ երեւույթը օրինաչափություն է հայ երեսփոխանների համար: Տարվա առաջին քառօրյան էլ այս առումով բացառություն չէր եւ հատկապես ՀՀԿ-ական պատգամավորներն աչքի ընկան իրենց «ճարպիկությամբ»՝ միանգամից 2-3 պատգամավորի փոխարեն «կողմ» կոճակները սեղմելու առումով: Լրագրողները օթյակից արձանագրել էին, թե փետրվարի 9-ի նիստի ժամանակ ինչպես են պատգամավորներ Արա Բաբլոյանը, Ռաֆիկ Գրիգորյանը, Հերմինե Նաղդալյանը, Արեգ Ղուկասյանը եւ ՀՀԿ խմբակցության քարտուղար Գագիկ Մելիքյանը քվեարկում այլ պատգամավորների փոխարեն՝ ապահովելով քվորումը մի շարք օրենքների ընդունման համար:

«Հայաստանի պառլամենտարիզմի կենտրոն» կազմակերպությունը ուրբաթ օրը նամակով դիմել է ԱԺ պատգամավորներին` տեղեկացնելով, որ հիմք ընդունելով Սահմանադրության եւ քրեական օրենսգրքի համապատասխան հոդվածները հաղորդում է ներկայացրել Հատուկ քննչական ծառայությանը՝ պատգամավորներ Արա Բաբլոյանին, Գագիկ Մելիքյանին, Հերմինե Նաղդալյանին եւ Արեգ Ղուկասյանին պատասխանատվության ենթարկելու ակնկալիքով:

Արեգ Ղուկասյանը «Հետքի» հետ զրույցում ասաց, թե առաջին անգամ է լսում, որ իր եւ իր գործընկերների դեմ դիմում է ներկայացվել ՀՔԾ: «Ես առաջին անգամ եմ լսում այդ մասին, ինչ վերաբերում է ուրիշի փոխարեն քվեարկելուն, ապա նշեմ, որ այդ պահին Վարդան Այվազյանն արդեն դահլիճում էր, որ իր փոխարեն քվեարկեցի»,-ասաց Արեգ Ղուկասյանը:

Մյուս պատգամավորներից պարզաբանում ստանալ չհաջողվեց: