«Բարգավաճ Հայաստան» խմբակցության նախկին պատգամավոր Մելիք Մանուկյանին պատկանող ընկերությունն այսօր Կառավարության կողմից 26 միլիոն դրամի արտոնություն ստացավ: «Մանուկյան կոնյակի գործարան» ընկերությունը Իտալիայից Հայաստան կներմուծի սարքավորումներ՝ մաքսատուրքի վճարներից ազատվելով:

Ներմուծվող սարքավորումների արժեքը մոտ 277 միլիոն դրամ է: Դրանք  կօգտագործվեն խաղողի և մրգային գինիների, կոնյակի և մրգային օղիների արտադրությունում:

Կառավարության հաղորդմամբ՝ ընկերությունը արդեն իսկ իրականացրել է 1 մլրդ 540 մլն դրամի ներդրում: Նախատեսում է ծրագրի շրջանակում իրականացնել ևս 1.3 մլրդ դրամի ներդրում` սարքավորումների ձեռքբերման և շինարարական աշխատանքների համար: Հետաքրքիր է, որ ընկերությունն այժմ ունի 4 աշխատատեղ, սակայն խոստացել է ներդրումային ծրագրի շրջանակում ստեղծել 42 նոր աշխատատեղ՝ 260 հազար դրամ միջին աշխատավարձով։

Նշենք, որ Մելիք Մանուկյանը ԱԺ պատգամավոր է եղել 2003-2018 թվականներին: