Փետրվարի 10-ին Ալավերդիում տեղի ուցեցավ «Բնապահպանական խնդիրները նոր մեդիայում և քաղաքական ուժերի օրակարգում» թեմայով քննարկում:

Այն վարում էր Երևանի մամուլի ակումբի փորձագետ Գեղամ Բաղդասարյանը: Զեկույցներով հանդես եկան «lragir.am» և «Ժամանակ» թերթերի լրագրող Սիրանույշ Պապյանը և «Էկոլուր» ՀԿ-ի ներկայացուցիչ Թերմինե Ենոքյանը:

«Թումանյանական աշխարհ» թերթի խմբագիր Արարատ Թամրազյանը հարց ուղղեց Գեղամ Բաղդասարյանին. «Ձեր խոսքի մեջ անընդհատ նշեցիք մենք, մեր, մեզ: Ներողություն, դուք ում շահերն եք պաշտպանում, մանավանդ որ խոսք եղավ նաև «մենք պետք է մերոնց ընտրենք», «նրանք պետք է նրանց ընտրեն»»: «Ես չեմ ասել` մենք պետք է մերոնց ընտրենք: Ի դեմս Երևանի մամուլի ակումբի` կարող եմ ասել, որ մենք ներկայացնում ենք քաղաքացիական հասարակությունը»,- պատասխանեց Գեղամ Բաղդասարյանը:

«Ուրեմն մենք քաղաքացիականից դուրս ենք, հա՞: Դուք քաղաքացիական եք, մենք չէ՞»,- ասաց Ա. Թամրազյանը: Բնապահապանական խնդիրների նկատմամբ հանրային կարծիքի մասին «Էկոլուր» ՀԿ-ի պատրաստած տեսանյութը դիտելուց հետո Արարատ Թամրազյանը ասաց. «Էս ամերիկյան խեղկատակությանը վերջ տվեք»: Ապա մի քանի ռեպլիկներից հետո հեռացավ դահլիճից:

Գեղամ Բաղդասարյանը ներկայացրեց ինտերնետի առավելությունները: «Մենք բոլորս գիտենք, որ կա ավանդական լրատվության միջոցներ` ռադիո, հեռուստատեսություն, տպագիր լրատվամիջոցներ և կան նոր լրատվամիջոցներ` ինտերնետային հրատարակություններ, էլեկտրոնային թերթեր, սրանց կարելի ավելացնել, որպես լրատվության ռեսուրսներ, սոցիալական ցանցեր` «Ֆեյսբուք» և այլն: Եթե ավանդական լրատվության դեպքում մենք հիմնականում սպառողներ ենք, ապա նոր մեդիայի պարագայում մենք նաև ակտիվորեն մասնակցում ենք լուրերի ստեղծմանը, անմիջականորեն և ակնթարթորեն ազդում ենք հանրային մթնոլորտի ձևավորմանը: Ինտերնետը` նոր մեդիան, շատ ավելի ժողովրդավարական է, քան թե ավանդական լրատվամիջոցները»,- ասաց Գեղամ Բաղդասարյանը: 

Վերջինս նաև նշեց հասանելիության առումով ինտերնետի առավելությունները:

Քննարկվող բնապահպանական խնդիրը նախագծի ղեկավարները համադրել էին մայիսի 6-ին կայանալիք խորհրդարանական ընտրությունների հետ` նպատակ ունենալով իրազեկված շարքային ընտրողի միջոցով բնապահպանական խնդրի լուծումներ պահանջել քաղաքական ուժերից:. Գեղամ Բաղդասարյանը հավաքվածներին նաև բացատրեց, որ քննարկման ընթացքում չի նախատեսվում բնապահպանական կոնկրետ քննարկում:

«Մենք ուզում ենք Ձեր կարծիքը իմանալ նաև` արդյո՞ք պատշաճ մակարդակով է այս խնդիրները լուսաբանվում մամուլում ու հատկապես նոր մեդիայում ` նոր այլընտրանքային լրատվամիջոցներով: Արդյոք լրագրողները ճի՞շտ են ներկայացնում իրական խնդիրը և արդյոք ներկայացնո՞ւմ են բոլոր կողմերի տեսանկյունները»: 

Լրագրող Վաղարշակ Ղորխմազյանին հետաքրքրեց, թե Հայաստանում կա՞, արդյոք, անկախ մամուլ: «Ինչ ունենք հանքարդյունաբերության մեջ, նույնն ունենք նաև մամուլում»,-ասաց Վ.Ղորխմազյանը: Վերջինիս Գեղամ Բաղդասարյանը պատասխանեց, որ այս պահին և այս փուլում Հայաստանում հնարավոր չէ ունենալ անկախ մամուլ. «Հայաստանում այս պահին, եթե խոսում ենք անկախ մամուլի մասին, խոսում ենք իշխանություններից անկախ լրատվության մասին»,-պատասխանեց փորձագետը: 

«Ինձ թվում է` ավելի կարևոր խնդիրներ կան, հացի խնդիր կա, սոցիալական շատ ավելի լուրջ խնդիր կա, որին երևի ավելի շատ պետք է անդրադառնալ, ես բնապահպանական խնդիրը խիստ վտանգավոր ու հրատապ չեմ համարում, ինչքան որ սոցիալական խնդիրը»,- ասաց Ալավերդու թիվ 8 ավագ դպրոցի տնօրեն Ալվարդ Բաբայանը: «Վահագն 21» ՀԿ-ի նախագահ Գոռ Հովվյանը գտնում է, որ Ալավերդու լրագրողները անգրագետ են, քանի որ իր մեջբերումները անելուց հետո, վերջում, իր կարծիքով, անգրագետ հետևություն են անում: «Դեբեդ» ՀԿ-ի նախագահ Ռաֆիկ Ղազինյանը կարծում է, որ քաղաքում պետք է ստեղծել անկախ և բոլորին մատչելի ինտերնետային կապ, որպեսզի անհրաժեշտության դեպքում բոլորը կարողանան բնապահպանական հրատապ խնդիրները փոխանցել ինտերնետային ցանցերին:

Ալավերդու քաղաքապետ Արտավազդ Վարոսյանի կարծիքով, Ալավերդիում չի գտնվի մի մարդ, ով ընդհանրապես անտարբեր լինեն բնապահպանական խնդիրների նկատմամբ: Քաղաքապետը, սակայն, գտնում է, որ բնապահպանական որակի հետ մարդկանց անհանգստացնում է կյանքի որակի հարցը: Արտավազդ Վարոսյանը համամիտ չէ վերջերս Թեղուտ եկած 200 երիտասարդների մոտեցումներին: «Ծայրահեղությունները լավ բանի չեն բերում: Մենք մի անգամ նորագույն պատմության մեջ առնչվել ենք մի խնդրի հետ` այլընտրանք չառաջարկելով և արդյունքում զրոյացրել ենք մեր ամբողջ արդյունաբերական պոտենցիալը»,- ասաց նա:

Ալավերդու Օրհուս կենտրոնի համակարգող Անուշ Էվոյանը գտնում է, որ բնապահպանական հարցերում լրագրողները գործ ունեն 2 տիպի հասարակության հետ: «Մի մասը ասում է` այո, մենք լավ ենք ապրում, գոհ ենք հանքարդյունաբերությունից: Ունենք հասարակության մի մաս, ով դեմ է հանքարդյունաբերությանը: Երկու դեպքում էլ մեզ մոտ բնապահպանական անվտանգությունը ապահովված չէ»:

Օրհուսի համակարգողը կարծում է, որ մամուլը հավասարապես պետք է հրապարակի երկու թևերի կարծիքը:

Ադրադարձ եղավ նաև քաղաքական կուսակցությունների օրակարգում տեղ գտած բնապահպանական խնդիրներին: «Որպես ափաչափ երկիր այս երկիրը պետք է պահպանել: Էս երկիրը շատ փոքր է, որ աջ ու ձախ ամեն տեղ պոչամբար սարքեն: Ես կցանկանայի այս ուղղությամբ բոլորս ձայն տանք այն կուսակցությանն ու մարդուն, ով վաղը մեզ չի խափի»,- ասաց Ռաֆիկ Ղազինյանը: