Երևանի ընդհանուր իրավասության դատարանի Աջափնյակի նստավայրում քիչ առաջ սկսվեց դատավորների հերթական ընդհանուր ժողովը։ Օրակարգում Բարձրագույն դատական խորհրդի դատավոր անդամների թափուր տեղերի ընտրության հարցն է:

Նիստին մասնակցող դատավորների թիվը հասնում է մոտ 190-ի, այսինքն՝ ընդհանուր ժողովը լիազոր է: Նշենք, որ Հայաստանում ներկայումս կա գործող 234 դատավոր։ Ընդհանուր ժողովը համարվում է իրավազոր, եթե դրան մասնակցում է դատավորների ընդհանուր թվի կեսից ավելին: ԲԴԽ դատավոր անդամների թափուր տեղերի ընտրությանը թեկնածություն է դրել 11 դատավոր՝ Դավիթ Բալայանը, Անահիտ Թումանյանը, Վահե Խալաթյանը, Գագիկ Հովհաննիսյանը, Վարդուհի Հովնանյանը, Սիմիզար Հովսեփյանը, Արգիշտի Ղազարյանը Մեսրոպ Մակյանը, Սուրեն Մնոյանը, Ռուբեն Վարդազարյանը և Ելենա Քոչարյանը:

Ժողովի մասնակից դատավորներից ոմանք չհերքեցին, որ ամենայն հավանականությամբ կքննարկի նաև Սահմանադրական դատարանի դատավոր Վահե Գրիգորյանի՝ Սահմանադրական դատարանում ճգնաժամի հետ կապված նամակն՝ ուղղված դատավորների ընդհանուր ժողովին։