HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Նախկին նախարար Արամ Հարությունյանի պաշտպանն ինքնաբացարկ կհայտնի նրա գործի վերաբացման բողոքները քննող դատավորին

Բնապահպանության նախկին նախարար, Ազգային ժողովի նախկին պատգամավոր Արամ Հարությունյանի պաշտպան Արման Բայադյանն ինքնաբացարկի միջնորդություն կներկայացնի Հարությունյանի և մյուսների գործը վերաբացելու որոշման դեմ բողոքները քննող դատավոր Նելլի Բաղդասարյանին:

Երևան քաղաքի ընդհանուր իրավասության դատարանում այսօր տեղի ունեցավ գործի վերաբացման դեմ բողոքների գործով դատական նիստ, որի ընթացքում Արման Բայադյանը հարց բարձրացրեց այն մասին, թե ինչպես է Արամ Հարությունյանի բողոքի քննությունը մակագրվել դատավոր Նելլի Բաղդասարյանին:

Հարկ է նշել, որ դատավոր Բաղդասարյանին մակագրված է եղել Արամ Հարությունյանին կաշառք ստանալու հարցում օժանդակելու մեջ մեղադրվող Արաքս Դիլանյանի բողոքը, որը դարձյալ գործի վերաբացման դեմ է, իսկ նույն որոշման դեմ Արամ Հարությունյանի բողոքը մակագրվել է Երևան քաղաքի ընդհանուր իրավասության դատարանի մեկ այլ դատավոր Մնացական Մարտիրոսյանին, որն այն ուղարկել է Երևանի ընդհանուր իրավասության դատարանի արդեն նախկին նախագահ Ռուբեն Վարդազարյանին: Վերջինս էլ բողոքն ուղարկել է Նելլի Բաղդասարյանին՝ Արաքս Դիլանյանի բողոքի հետ համատեղ քննելու համար: Մեղադրյալների պաշտպաններն այժմ պնդում են, որ տարբեր դատարանների վարույթում գտնվող գործերը մեկ վարույթում միացնելու և համատեղ քննելու օրենքով նախատեսված ընթացակարգ չկա:

Այսօրվա դատական նիստին Արման Բայադյանը ցանկանում էր ինքնաբացարկի բանավոր միջնորդություն ներկայացնել դատավորին, վերջինս սակայն պարտադիր համարեց միջնորդությունը գրավոր տարբերակով ներկայացնելը՝ փաստաբանին տրամադրելով 15 րոպե ժամանակ գրավոր տեքստը պատրաստելու համար: Բայադյանը 15 րոպե անց ասաց, թե չի հասցրել միջնորդությունը գրավոր պատրաստել՝ ևս մեկ անգամ պնդելով, որ դատավորին ինքնաբացարկի միջնորդություն կարող է ներկայացվել նաև բանավոր: Դատավոր Բաղդասարյանը, սակայն, ավելի քան մեկուկես ամսով հետաձգեց նիստը՝ նշելով, որ պաշտպանին ժամանակ է տրամադրում ինքնաբացարկի միջնորդությունը կազմելու համար: Բացի այդ, Բաղդասարյանը նաև հայտնեց, որ դատարանը գերծանրաբեռնված է: Հաջորդ դատական նիստը տեղի կունենա սեպտեմբերի 20-ին:

Այսօրվա դատական նիստին ներկա էր նաև Արամ Հարությունյանի դեմ ցուցմունք տված Սիլվա Համբարձումյանը: Խոսելով գործի քննությունը ձգձգելու պատճառների մասին՝ Համբարձումյանն ասաց, որ պատճառը մեղադրյալների թիվն է:

«Գործով անցնող անձանցից 3-4-ը փախած են՝ այդ թվում Սուրեն Ավագյանը, Սևանի հոգեբուժարանի նախկին տնօրեն Գագիկ Կարապետյանը։ Գործով միայն մեկն է կալանավորված, մեկը ստորագրությամբ է շրջում Հայաստանում, իսկ կարևոր դեմքին՝ Արամ Հարությունյանին, չեն կարողանում գտնել։ Բոլորը պնդում են, որ Արամ Հարությունյանը Հայաստանում է»,- ասաց Սիլվա Համբարձումյանը:

Հարցին, թե ի՞նչն է պատճառը, որ մինչ այս պահը Հարությունյանին չեն հայտնաբերել, Համբարձումյանն ասաց.

«Կարծում եմ՝ նա լավ է թաքնվում, չեմ կարծում, որ իրավապահներն են թերանում, քանի որ սա վարչապետի հանձնարարականն է»:

Հիշեցնենք, որ Արամ Հարությունյանը մեղադրվում է Սիլվա Համբարձումյանից առանձնապես խոշոր չափի կաշառք ստանալու և փողերի լվացման մեջ: Նա գտնվում է հետախուզման մեջ, նույն հոդվածներով մեղադրյալ է նաև Արամ Հարությունյանի մտերիմներից Վիկտոր Մարտիրոսյանը: Վերջինս գտնվում է կալանքի տակ: Մարտիրոսյանի, ինչպես նաև Արամ Հարությունյանին կաշառքի հարցում օժանդակելու մեջ մեղադրվող Արաքս Դիլանյանի գործերը անջատվել են Արամ Հարությունյանի գործից և ուղարկվել դատարան:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։