Օգոստոսի 3-ին Ավստրալիա աշխատանքային այցի վերջին օրը արտաքին գործերի նախարար Մասիս Մայիլյանի գլխավորած Արցախի Հանրապետության պատվիրակությունը ժամանել է Մելբուրն։
Ըստ նախարարության հաղորդագրության՝ պատվիրակության անդամներն այցելել են Սուրբ Մարիամ Աստվածածին Հայ առաքելական եկեղեցի, հանդիպել եկեղեցու հոգևոր հովիվ Խաչեր քահանա Հարությունյանի և եկեղեցու ծխական խորհրդի անդամների հետ։ Պատվիրակությունը նաև այցելել է Մելբուրնի հայկական Սուրբ Մեսրոպ Մաշտոց և Ագինյան դպրոցներ։
Նույն օրը Հայ կենտրոնում տեղի է ունեցել արցախցի պաշտոնյաների հանդիպում Մելբուրնի հայկական համայնքի ներկայացուցիչների հետ։ Միջոցառման ընթացքում ցուցադրվել է Արցախի ԱԳՆ հեղինակած՝ «Արցախ․ պատմություն և հակամարտություն» խորագիրը կրող տեսաֆիլմը։
Հանդիպմանն ունեցած իրենց ելույթներում Արցախի ԱԳ նախարար Մասիս Մայիլյանը և ԱԺ պատգամավոր Դավիթ Իշխանյանն անդրադարձ են կատարել Արցախի արտաքին, անվտանգային, ներդրումային և ներքին քաղաքականությանը վերաբերող հարցերին։
Բանախոսները շնորհակալություն են հայտնել Հայ Դատի Ավստրալիայի հանձնախմբին և բոլոր աջակիցներին՝ արդյունավետ և հաջողված այցի կազմակերպման համար։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter
Մեկնաբանել