Ռաֆիկ Մաշադյանը ՊԵԿ նախագահի առաջին տեղակալի պաշտոնում նշանակվել է 2018թ. մայիսի 24-ին: Այդ պաշտոնում նշանակվելուց հետո Ռաֆիկ Մաշադյանի դստեր ամուսինը՝ Գոռ Մկրտչյանը, նշանակվել է ՊԵԿ մաքսանենգության դեմ պայքարի վարչության Զվարթնոց բաժնի գլխավոր մաքսային տեսուչ:

Բարձրաստիճան պաշտոնատար անձանց էթիկայի հանձնաժողով ներկայացրած գույքի ու եկամուտների հայտարարագրի համաձայն՝ Գոռ Մկրտչյանի 2018թ. տարեկան եկամուտը կազմել է մոտ 13 մլն 464 հազար դրամ, որից աշխատավարձը՝ մոտ 3 մլն 464 հազար դրամ, իսկ 10 մլն դրամը գոյացել է MERCEDES-BENZ VIANO 2.2 CDI մակնիշի ավտոմեքենայի օտարումից:

Այդքանով չեն սահմանափակվում Գոռ Մկրտչյանի ֆինանսական միջոցները: Նա, որպես դրամական միջոց՝ հայտարարագրել է նաև 21 մլն դրամ, 48,000 դոլար և 40,000 եվրո:

Պաշտոնը ստանձնելու օրվա՝ 2018թ. հոկտեմբերի 1-ի դրությամբ, Գոռ Մկրտչյանն ունեցել է 1 բնակարան, 3 հասարակական նշանակության շինություն և PORSCHE CAYENNE Turbo 4.8 մակնիշի ավտոմեքենա: Իսկ դրամական միջոցները կազմել են 23 մլն դրամ, 50,000 դոլար և 40,000 եվրո:

Գոռ Մկրտչյանի կինը՝ Ռուզան Մաշադյանը, 2018թ. ընթացքում որևէ եկամուտ չի հայտարարագրել, սակայն իր հաշվին ունեցել է 10 մլն դրամ և 10,000 դոլար:

Նշենք, որ Ռաֆիկ Մաշադյանի 2018թ. հայտարարագրված եկամուտը կազմել է մոտ 20 մլն դրամ, որը աշխատավարձի չափն է: Սակայն, հաշվին ունեցել է 7 մլն դրամ և 67,000 դոլար:

ՊԵԿ նախագահի տեղակալի կինը՝ Արինա Մաշադյանը, 2018թ-ին եկամուտ չի ունեցել, սակայն իր հաշվին եղել է 35,000 դոլար: Նույնն է եղել նաև 2017-ին:

Տեղեկացնենք, որ Ռաֆիկ Մաշադյանը բարձրաստիճան պաշտոնատար անձանց էթիկայի հանձնաժողով չի ներկայացրել ՊԵԿ նախագահի առաջին տեղակալի պաշտոնը ստանձնելու օրվա դրությամբ ունեցած գույքի ու եկամուտների վերաբերյալ հայտարարագիրը: Իսկ 2017թ. հուլիսի 1-ին, երբ ստանձնել է ՊԵԿ Կազմակերպման և հսկողության վարչության պետի պաշտոնը (կենսագրական տվյալներում նշված չէ այս պաշտոնի մասին), այդ օրվա դրությամբ ունեցել է 2 առանձնատուն, մեկ բնակարան և 2 միավոր հողամաս: Որպես շարժական գույք հայտարարագրել է MERCEDES-BENZ ML550 մակնիշի ավտոմեքենան:

2017թ. հուլիսի 1-ի դրությամբ Մաշադյանի եկամուտը կազմել է մոտ 4 մլն 240 հազար դրամ, որն աշխատավարձն է: Իսկ հաշվին ունեցել է 4 մլն 100 հազար դրամ և 105,000 դոլար: Սակայն, առանց որևէ ծախս հայտարարագրելու անհասկանալիորեն նվազել են դոլարային միջոցները և 2017-ի տարեկան հայտարարագրում կազմել՝ 85,000 դոլար, իսկ դրամական միջոցն ավելացել է 900,000 դրամով՝ հասնելով 5 մլն-ի:

Լուսանկարում՝ Ռաֆիկ Մաշադյանը (նկարը՝ Sputnik Armenia-ի)