Ռուսաստանի Կրասնոյարսկի երկրամասի Աչինսկի շրջնում պայթյուն է տեղի ունեցել ՌԴ Կենտրոնական ռազմական օկրուգի նյութատեխնիկական ապահովման պահեստներից մեկում: Ռուսական լրատվամիջոցները, հղում անելով արտակարգ իրավիճակների տարածքային ծառայությանը, գրում են, որ հրետանային պահեստում կարող են լինել 40 հազար արկեր, այդ թվում՝ 152 մմ և 125 մմ տրամաչափի: 

Պայթյունը տեղի է ունեցել օգոստոսի 5-ին՝ Մոսկվայի ժամանակով 13:00-ին: Զինամթերքի պահեստը գտնվում է Կամենկա գյուղի մոտակայքում, պայթյունից հետո գյուղի բնակիչները տարհանվել են: Կամենկայից բացի տարհանվել են նաև երեք հարակից բնակավայրերի բնակիչները՝ ընդհանուր 3000 մարդ:

Ականատեսներն արձանագրել են պայթյունի պահը / © РБК

Տարհանումը կազմակերպվել է պայթյունից 20 կիլոմետր շառավիղով, քանի որ ըստ արտակարգ իրավիճակների տարածքային ծառայության ներկայացուցչի՝ նկատվել են մինչև 15 կիլոմետր հեռավորության վրա նետված բեկորներ:

ТАСС-ի հաղորդմամբ՝ պայթյունի հետևանքով տուժել է 8 մարդ, որից 4-ը՝ զինծառայողներ: Վիրավորներից 4-ը տեղափոխվել են հիվանդանոցներ, իսկ մյուս 4-ը գտնվում են ամբուլատոր հսկողության ներքո:

Ռուսաստանի պաշտպանության նախարարություն էլ հայտնում է, որ պայթյունի պատճառը եղել է զինամթերքի մոտ բռնկված վառոդի լիցքերը:

Լուսանկարը՝ Reuters-ի