Արմավիրի մարզի Գրիբոյեդով համայնքի մանկապարտեզի խմբերից մեկի ննջասենյակի պատուհանը բացվում է ուղիղ մշակույթի տան կինոդիտման մեծ հադլիճի մեջ: Տեսարանն այնքան էլ հրապուրիչ չէ, քանի որ դահլիճը չգործող է, իսկ արտաքին տեսքն՝ անմխիթար: Այդ սենյակում այլ պատուհան չկա, և երեխաները ստիված են ամեն օր «վայելել» այդ տեսարանը:

Գյուղի մանկապարտեզը հարմարեցված և տեղակայված է մշակույթի տան շենքում: Մանկապարտեզի հիմնական շենքը վթարային է և կապիտալ վերանորոգման կարիք ունի: Ստիպված տեղափոխվել են մշակույթի տան շենքի երկրորդ հարկ: Մանկապարտեզ է հաճախում 60 երեխա:

Մանկապարտեզը սեզոնային է, գործում է 7-8 ամիս, քանի որ չունի ջեռուցման համակարգ: Մշակույթի տունը գազիֆիկացված չէ, իսկ նման հնարավորության դեպքում էլ մանկապարտեզը չի կարող օգտվել դրանից, քանի որ այդ տարածքի համար չունի սեփականության իրավունքի վկայական:

Գրիբոյեդովի մշակույթի տանն է տեղակայված նաև գյուղի ամբուլատորիան, քանի որ առանձին շենք չունի:

Տարիների ընթացքում  մշակույթի տան շենքում մասնակի վերանորոգման աշխատանքներ կատարվել են: Փոխվել է շենքի տանիքը, մասնակի փոխվել են դռներն ու պատուհանները: Այժմ էլ ներքին հարդարման աշխատանքներ են կատարվում առաջին հարկի նախասրահում, որտեղով ելումուտ են անում թե մանկապարտեզի երեխաներն ու աշխատակազմը, թե ամբուլատորիա հաճախողները:

Համայնքապետարանը փորձում է հնարավորինս տեսքի բերել մանկապարտեզի զբաղեցրած տարածքը՝ ճաքճքած պատերը ծածկելով գունազարդ նկարներով, պաստառներով: Իսկ երեխաների պաշտպանության միջազգային օրվա առթիվ մանկապարտեզի համար ձեռք են բերել նոր մահճակալներ, պատրաստվում են տեղադրել նաև արևային ջրատաքացուցիչներ: Սակայն, այս ամենով հանդերձ, ակնհայտ է, որ տարածքը վերանորոգման կարիք ունի և հարմարեցված տարածքում գոևրծունեություն ծավալելն առաջ է բերում դժվարություններ, անհարմարություններ:

Գրիբոյեդովի համայնքապետ Վահե Գրիգորյանն ասում է, որ մշակույթի տան վերանորոգման նախահաշիվ չունեն, քանի որ համայնքապետարանը չի կարող իր միջոցներով վերանորոգում իրականացնել: Իսկ համայնքի բնակիչները սուբվենցիոն ծրագրրին դիմելու հարցում առաջնահերթությունը տվել են համայնքապետարանի գլխավոր ճանապարհի ասֆալտապատմանը:

«Այս պահին ընթացող կոսմետիկ վերանորոգման համար հատկացրել ենք մոտ մեկ միլիոն դրամ: Ամբողջ շենքի նախահաշիվը չունենք: Շինարարը  հենց գյուղի բնակիչ է, խոսել ենք, մատչելի գներով աշխատանքն իրականացնում է»,-հավելեց համայնքի ղեկավարը:

Մշակույթի  տան երկրորդ հարկում ժամանակին տեղակայված է եղել նաև համայնքապետարանի ենթակայության տակ գործող գրադարանը: Սակայն, մինչև տանիքի վերանորոգումը, անձրևաջրերի հետևանքով գրքերի մեծ մասը փչացել է և դարձել ոչ պիտանի: Պահպանվել է մի քանի կտոր գրականություն, սակայն, եղած գրքերն այնքան քիչ են, որ հնարավոր չէ դրանցով գրադարան բացել:

Թեև մշակույթի տունը կիսաավեր վիճակում է, Վահե Գրիգորյանի հավաստմամբ, գյուղում գործում է երկու պարի խմբակ՝ լատինո և ժողովրդական, ինչպես նաև սպորտի խմբակ:

«Մշակութային կյանքը, որ համայնքներում պիտի զարգանա, միանշանակ կողմ եմ: Ճիշտ է, չի կարող նախկինի նման զարգանալ, որ գյուղում կինո էին ցուցադրում և այլն, բայց պիտի զարգանա»,-ասում է Գրիբոյեդովի համայնքապետը: