Կգնվեն լրացուցիչ աջակցող միջոցներ հաշմանդամություն և սոցիալական այլ կարգավիճակ ունեցող անձանց համար
Կառավարությունն այսօրվա նիստին որոշեց պետական բյուջեից գումար հատկացնել պրոթեզաօրթոպեդիկ և վերականգնողական պարագաների, վերականգնմանն աջակցող այլ տեխնիկական միջոցների ձեռքբերման նպատակով։
Գումարը տրամադրվելու է աշխատանքի և սոցիալական հարցերի նախարարությանը, ում հաղորդմամբ՝ այս տարվա առաջին կիսամյակի ընթացքում նախատեսվածից ավել շահառուներ են այդ պարագաները ստանալու համար դիմել նախարարություն։
Աշխատանքի և սոցիալական հարցերի նախարար Զառա Բաթոյանի հաղորդմամբ՝ իրենց հատկացվող 71 միլիոն դրամով գնելու են 1253 աջակցող սարք։
«Պետական հավաստագրերի հիման վրա աջակցող միջոցների տրամադրումը հնարավորություն է ընձեռում անձին ընտրություն կատարել և ձեռք բերել իր կարիքի առավելագույնս հարմար աջակցող միջոցները: Այս հանգամանքով, միաժամանակ հանրային իրազեկման բարձրացմամբ պայմանավորված` մեծացել է շահառուների դիմելիությունը, և որոշ աջակցող միջոցների` 2019 թվականի տարեկան բյուջեով նախատեսված քանակը սպառվել է»,-կառավարություն ներկայացված որոշման նախագծում հայտնել է նախարարությունը։
Մեկնաբանել