«Զիգզագ» ընկերությունն արձագանքել է «Հետք»-ի՝ օգոստոսի 14-ի հրապարկմանը։ Ինչպես հայտնել էինք՝ փաստաբան Օլգա Սաֆարյանից  20 օր էր պահանջվել էլեկտրատեխնիկայի վաճառքով զբաղվող «Զիգզագ» ընկերությունից որպես փոխհատուցում նոր հեռախոս ստանալու համար։ Թեև շարքից դուրս եկած հեռախոսն ուներ մեկ տարվա երաշխիք, Սաֆարյանը պարտադրված էր եղել 20 հազար դրամ լրացուցիչ գումար վճարել՝ այլ մոդելի հեռախոս գնելու համար, քանի որ ընկերությունը չուներ անսարք հեռախոսի նույն մոդելից։

«Զիգզագ» ընկերությունը հրապարկման վերաբերյալ երեկ գրավոր պարզաբանում է ուղարկել։

Ընկերությունը հայտնել է, որ հաճախորդին վաճառվել է պատշաճ որակի ապրանք՝ առանց որևէ գործարանային թերության և խնդրի: Սակայն գնումը կատարելուց հետո՝ հուլիսի 24-ին, Օլգա Սաֆարյանը դուստրը` Աննա Սաֆարյանը, բջջային հեռախոսը ներկայացրել է ‹‹Զիգզագ›› ընկերության սպասարկման կենտրոն` ‹‹հեռախոսը չի միանում›› խնդրով: Ընկերության հաղորդմամբ՝ սպասարկման կենտրոնում հեռախոսն ընդունել են ախտորոշման` ներկայացված խնդիրը հայտնաբերելու և վերացնելու նպատակով, իսկ հաճախորդին ժամանակավոր օգտագործման համար տրամադրվել է նմանօրինակ բջջային հեռախոս:

Ըստ ընկերության, ախտորոշմամբ պարզվել է, որ հեռախոսն ունի էլեկտրական սալիկի վնասվածություն․ համաձայն երաշխիքային սպասարկման պայմանների, այն ենթակա է անվճար փոխարինման և պահեստամասը սպասարկման կենտրոնը մատակարարից պատվիրել է։

«Համաձայն «Սպառողների իրավունքների պաշտպանության մասին» ՀՀ օրենքի “Ապրանքում հայտնաբերված թերությունները պետք է վերացվեն արտադրողի (վաճառողի) կամ կոմիսիոների կողմից` ապրանքի թերությունների վերացման վերաբերյալ սպառողի պահանջների ներկայացման օրից` քսան օրվա ընթացքում:»,-հայտնել են ընկերությունից։

«Զիգզագ» ընկերության փոխանցմամբ՝ հաշվի առնելով, որ պատվիրված պահեստամասի ստացումը պահանջել է ավելի երկար ժամանակ, հաճախորդին օրենքով սահմանված ժամկետում առաջարկել են խոտանված հեռախոսի փոխանակում նորով: Փոխանակումն իրականացնելու պահին ընկերությունում հաճախորդի կողմից նախկինում գնված բջջային հեռախոսի նույն մոդելը առկա չի եղել, ինչը ընկերության հաղորդմամբ «բնականոն է»: Այս պարագայում, ընկերությունը համաձայն «Սպառողների իրավունքների պաշտպանության մասին» օրենքի, հաճախորդին առաջարկվել է այլ մոդելի հեռախոսով փոխարինում` գնման գնի համապատասխան վերահաշվարկով: Առաջարկված տարբերակներից Օլգա Սաֆարյանը կատարել է այլ մոդելի ընտրություն` 20.000 դրամի չափով գնման գնի տարբերության հավելավճարով։

«Ապրանքն հաճախորդի կողմից ձեռք է բերվել երաշխիքային սպասարկման պայմանով և գտնվել է երաշխիքային սպասարկման ժամկետի մեջ, ինչը նշանակում է, որ երաշխիքային ժամկետում ապրանքի հետ որևէ խնդիր լինելու պարագայում այն ենթակա է ‹‹Զիգզագ›› ապասարկման կենտրոնի կողմից ընդունման և համապատասխան ախտորոշման, ինչը և իրականացվել է ընկերության կողմից: Օրենքով և երաշխիքային սպասարկման պայմաններով սահմանված ժամկետում և կարգով ընկերության կողմից խնդրին տրվել է պատշաճ լուծում»,-հայտնել են «Զիգզագ» ընկերությունից։