Դատավորներն արձակուրդում են. ԲԴԽ անդամի ընտրության հարցով արտահերթ ժողովը հետաձգվեց
Երևան քաղաքի ընդհանուր իրավասության դատարանի Աջափնյակի նստավայրում այսօր նշանակված էր դատավորների արտահերթ ընդհանուր ժողով, որի ընթացքում պետք է ընտրվեր Բարձրագույն դատական խորհրդի դատավոր անդամ:
Ժողովի մեկնարկին, սակայն, պարզ դարձավ, որ քվորում չի ապահովվում:
Հայաստանում ներկայումս կա գործող 234 դատավոր։ Ընդհանուր ժողովն իրավազոր է, եթե դրան մասնակցում է դատավորների ընդհանուր թվի կեսից ավելին, սակայն ժողովին, ըստ նախնական տվյալների, մասնակցում էր 69 դատավոր: Դատական դեպարտամենտի ղեկավար Կարեն Փոլադյանը լրագրողների հետ զրույցում ասաց, որ իրենց ունեցած տվյալներով՝ 96 դատավոր գտնվում է արձակուրդում, կան նաև հերթապահության մեջ գտնվող դատավորներ, որոնք չէին կարող ներկայանալ:
Նշենք, որ Բարձրագույն դատական խորհրդի դատավոր անդամի թափուր տեղի ընտրությունն ընթանալու է Վճռաբեկ դատարանի քաղաքացիական և վարչական պալատի դատավորներ Սուրեն Անտոնյանի, Մամիկոն Դրմեյանի, Գոռ Հակոբյանի, Ստեփան Միքայելյանի և Տիգրան Պետրոսյանի միջև:
Բարձրագույն դատական խորհրդում Վճռաբեկ դատարանի դատավորի թափուր տեղն առաջացել է, քանի որ ԲԴԽ դատավոր ընտրված Նախշուն Տավարացյանը հրաժարական է տվել։
Մեկնաբանել