Հայաստանի կառավարությունը համաձայնություն է տվել Վանաձորում Ուկրաինայի հյուպատոսություն ունենալու առաջարկին: Այն սպասարկելու է Լոռու, Արագածոտնի և Արմավիրի մարզերը:

Հյուպատոսության գործունեության ապահովման նպատակով Տարածքային կառավարման և ենթակառուցվածքների նախարարությունը նախագիծ է քննարկման ներկայացրել՝ առաջարկելով հյուպատոսությանն անհատույց կարգով տարածք տրամադրել։ Դա կլինի Հայաստանի աջակցությունն այդ գործընթացին:

Նախարարությունը հայտնել է, որ այս ծրագիրը Լոռու, Արագածոտնի և Արմավիրի մարզերի կազմակերպությունների և քաղաքացիների համար հարմար պայմաններ կապահովի։

Ինչպես ենթադրվում է նախագծից, տրամադրվելու է դպրոցի շենք․ նախարարության հաղորդմամբ՝ հյուպատոսության տարածքն ունենալու է առանձնացված մուտք և այն չի խաթարելու դպրոցի ուսումնադաստիարակչական գործընթացը:

«Հայաստանի Հանրապետությունում Ուկրաինայի արտակարգ և լիազոր դեսպանի և հյուպատոսի միջև կնքվել է պայմանագիր: Դեսպանատունը Վանաձոր քաղաքում չունի շենքային պայմաններ, տարածքի տրամադրման դեպքում այն կվերանորոգվի դեսպանատան միջոցներով»,- հայտնել է նախարարությունը։