Փոփոխություն՝ նախագահի, Ազգային ժողովի և վարչապետի աշխատակազմերի գնումների կազմակերպման կարգում
Կառավարությունը որոշեց փոփոխություն կատարել նախագահի, Ազգային ժողովի և վարչապետի աշխատակազմերի գնումների կազմակերպման կարգում։ Նոր կարգով այսուհետ այդ մարմինների աշխատակազմերում գնումների պատվիրատուի ղեկավար կնշանակվի այդ կառույցների աշխատակազմի ղեկավարի կողմից լիազորված պաշտոնատար անձը: Նախկինում այդ լիազորությունն ուներ վարչապետի աշխատակազմի ղեկավարը։
Կառավարությունը նման որոշում կայացրեց այսօրվա նիստին՝ Ֆինանսների նախարարության առաջարկությամբ։
Ֆինանսների նախարարության հաղորդմամբ՝ գնումների մասին օրենսդրությամբ՝ նախագահի, Ազգային ժողովի և վարչապետի աշխատակազմերը առանձին պատվիրատուներ են։ Դրանցից յուրաքանչյուրն ինքնուրույն է կազմակերպում և ղեկավարում իր կարիքների համար կատարվող գնումների գործընթացները: Սակայն գործող կարգում առկա ձևակերպման համաձայն՝ այդ մարմիններում պատվիրատուի ղեկավար կարող է լինել վարչապետի աշխատակազմի ղեկավարի կողմից լիազորված պաշտոնատար անձը, «ինչն ի սկզբանե նպատակային չի եղել և չի բխում գնումների գործընթացների հետ կապված հարաբերությունների կարգավորման ռազմավարությունից»,- հայտնել է նախարարությունը՝ առաջարկելով վերը նշված փոփոխությունը։
Մեկնաբանել