Ֆինանսների նախարարը՝ պետական պարտքի, Ամուլսարի հանքի շահագործման, 5 մլն դրամով ԱԺ գորգերը լվանալու մասին
Պետական բյուջեի եկամուտների կանխատեսումը չի կատարվում ըստ առանձին վերցրած կազմակերպությունների. այն կատարվում է հիմք ընդունելով վիճակագրության 7 մակրոցուցանիշները: Այս մասին Կառավարության նիստից հետո լրագրողների հետ զրույցում ասաց ֆինանսների նախարար Ատոմ Ջանջուղազյանը՝ պատասխանելով հարցին, թե Հայաստանի պետբյուջեի վրա ի՞նչ ազդեցություն կարող է լինել, եթե Ամուլսարի հանքը չշահագործվի:
Հարցին, թե նախարարն ի՞նչ կարծիք ունի հանքի շահագործման վերաբերյալ, Ջանջուղազյանը պատասխանեց, թե պետք է ապավինել մասնագետների փորձաքննության արդյունքներին և առաջնորդվել դրանով:
«Ցանկացած հարցի միակողմանի դիտարկումը իր մեջ ռիսկ է պարունակում: Միշտ այնտեղ, որտեղ կա առավելությունը, դրա կողիքն կարող է լինել թերություն: Պետք է կշռվի այդ ամենը և հավասարակշռված որոշման գա: Եթե միայն տնտեսական տեսանկյունից հարցը դիտարկվեր, ապա այս ամբողջ գործընթացը տեղի չէր ունենա, քանի որ տնտեսական շահավետությունը վաղուց որոշակիացված էր»,- ասաց նախարարը:
Անդրադառնալով Ամուլսարի հանքը շահագործելու վերաբերյալ քաղաքացիների դժգոհություններին՝ նախարարը նշեց, թե նրանք ունեն իրենց դժգոհությունն արտահայտելու իրավունք:
Ջանջուղազյանը խոսեց նաև Հայաստանի պետական պարտքի դինամիկայի մասին:
«Պետական պարտքի դինամիկան մեզ թույլ է տալիս եզրակացնել, որ ռիսկերը կառավարելի են. մենք չունենք չկանխատեսված կամ անկանխատեսելի բացասական փոփոխություն»,- ասաց Ջանջուղազյանը:
Լրագրողի հարցին, թե ինչպես է նախարարը վերաբերում ԱԺ գորգերը լվանալու համար պետբյուջեից 5 մլն դրամ հատկացնելուն, նախարարը հստակ պատախան չտվեց: Լրագրողները տարբեր հարցերի միջոցով փորձում էին նրանից հստակ պատասխան ստանալ այն մասին, թե արդյոք 5 մլն դրամը նման միջոցառման համար խելամի՞տ ծախս է: Նախարարը «կտտանքների ենթարկել» որակեց այս թեմային հարցեր ուղղելու գործընթացը:
Մանրամասները՝ տեսանյութում:
Մեկնաբանել