Տեսանյութեր
Լուսանկարներ
Վահան Հովհաննիսյան. «Ես հասկանում եմ, որ մեծամասնականով ընտրվածը միշտ այնքան փող ունի, որ Երեւանում մեկ կամ երկու բնակարան կամ առանձնատուն ունենա»
100-տոկոսանոց համամասնական ընտրակարգին անցնելու կապակցությամբ այսօր հրավիրված խորհրդարանական լսումների ժամանակ ՀՅԴ խմբակցության պատգամավոր Վահան Հովհհաննիսյանը հայտարարեց, թե չի կիսում այն կարծիքը, որ ամբողջությամբ համամասնական ընտրակարգին անցնելու դեպքում ընտրող-պատգամավոր կապը կկորի:
«Բացի մի քանի հոգուց` իրենց մարզերում ու ընտրատարածքներում, որտեղից իբր ընտրվել են, ոչ ոք չի ապրում: Ես հասկանում եմ, որ մեծամասնականով ընտրվածը միշտ այնքան փող ունի, որ Երեւանում մեկ կամ երկու բնակարան կամ առանձնատուն ունենա, բայց մարդիկ կան, որ ընդհանրապես իրենց ընտրատարածքներում չեն երեւացել: Այդ տեղամասերում չգիտեն իրենց պատգամավորն ով է, որովհետև ինքը ոչ միայն այնտեղի բնակիչ չէ, ինքն այնտեղ չի էլ երեւացել: Լավ, այստեղ չեն մոտենում ամբիոնին, ծպտուն չեն հանում, լավ էլ անում են, պատկերացնու՞մ եք՝ խոսային էլ»,- հայտարարեց Վահան Հովհաննիսյանը:
Ըստ պատգամավորի՝ բոլոր երվրոպական երկրներն անցել են համամասնական ընտրակարգին, եւ ժամանակն է, որ Հայաստանն էլ անցնի:
Իսկ ԲՀԿ խմբակցության պատգամավոր Նաիրա Զոհրաբյանի ասելով՝ կայուն ժողովրդավարական երկրներում ընտրակարգերի հարցի քննարկման անհրաժեշտություն չէր կարող ծագել, այդ իսկ պատճառով եվրոպացի գործընկերները զարմանքով են արձագանքում, երբ նման հարց է բարձրացվում նրանց առջեւ:
«Ի վերջո, թե համամասնական, թե մեծամասնական ընտրակարգերն էլ ունեն առավելություններ, կարեւորը արդար եւ թափանցիկ ընտրություններ անցկացնելն է»,- ասաց Նաիրա Զոհրաբյանը եւ հավելեց, որ մեծամասնական ընտրակարգով ավելի հեշտ է ընտրակեղծիքներ իրականացնել, այդ իսկ պատճառով մեծամասնականի կողմնակիցներին խորհուրդ տվեց հարցնել ժողովրդի կարծիքը:
«Պետք է դիմել հանրությանը, պարզել, թե որ ընտրակարգով են ցանկանում, որ անցկացվեն ընտրությունները»,- ավելացրեց Նաիրա Զոհրաբյանը:
Իսկ թիվ 14 ընտրատարածքից մեծամասնականով ընտրված պատգամավոր Լյովա Խաչատրյանն էլ հայտարարեց, թե մեծամասնական ընտրությունների հետեւանքը լինում է թշնամանքը մարդկանց միջեւ, եւ ինքը, լինելով մեծամասնականով ընտրված պատգամավոր, մի շարք օրինագծեր ունի, սակայն չի կարողանում շրջանառության մեջ դնել, որովհետեւ որեւէ կուսակցության անդամ չէ:
«Ինձ համար մեկ կլիներ, թե ինչպես կընթանային ընտրությունները, եթե մի շարք նյուանսներ չլինեին, եթե ունենայինք զարգացած քաղաքական համակարգ, բայց մեծամասնականով ընտրապայքարը վերածվել է ձեռնամարտի ու բոլոր այն բացասական երևույթները, որոնցով ուղեկցվում են ընտրությունները, կապված են մեծամասնականի հետ: Թշնամանք են առաջացնում, որը սկսում է մեծամասնականում»,- ավելացրեց Լյովա Խաչատրյանը:
Մեկնաբանել