Հայտարարել 40 օր ժամկետով վարժական հավաքներ․ ՊՆ-ի նոր նախագիծը
Պաշտպանության նախարարությունն առաջարկում է հոկտեմբերի 20-ից մինչև նոյեմբերի 30-ը հայտարարել պահեստազորի առաջին խմբի առաջին կարգում հաշվառված շարքային, ենթասպայական և սպայական կազմերի պահեստազորայինների վարժական հավաքներ։ Նախարարության հաղորդմամբ՝ վարժական հավաքներին կներգրավվի 316 քաղաքացի, որից 220-ը` շարքային կազմի, 12-ը` ենթասպայական կազմի, 84-ը` սպայական կազմի պահեստազորայիններ:
Նման նախագիծ է նախարարությունը քննարկման ներկայացրել իրավական ակտերի նախագծերի հրապարակման միասնական կայքում։
Նախարարությունը հայտնել է, որ վարժանքի ընթացքում կկատարելագործվեն նրանց ռազմական հմտությունները, կկայանան վերապատրաստման և պատրաստման վարժական հավաքներ:
«Հաշվի առնելով այն հանգամանքը, որ վերջին տարիներին ՀՀ զինված ուժերը համալրվել են նոր սպառազինությամբ ու ռազմական տեխնիկայով, անհրաժեշտություն է պահեստազորայինների մասնագիտական պատրաստվածության որակի բարձրացումը` պահեստազորում կուտակելով համապատասխան զինվորական հաշվառման մասնագիտություն ունեցող պահեստազորայիններ»,- հայտնել է ՊՆ-ն։
Նախարարությունն ընդգծել է՝ անհրաժեշտ է, որ զինված ուժերում լինեն մարտունակ ստորաբաժանումներ` համալրված բարձր մասնագիտական պատրաստվածությամբ և ռազմաուսուցված պահեստազորայիններով:
ՊՆ-ն նախատեսում է վարժական հավաքների ծախսերն իրականացնել այս տարվա պետական բյուջեով այդ նպատակով հատկացված միջոցների հաշվին:
Մեկնաբանել