«Հետքի» հարցերին պատասխանում է ԱԺ պատգամավոր, ՀՀԿ խմբակցության անդամ Հովհաննես Սահակյանը

Արման Մուսինյանը մեր թերթին ասաց, որ մինչեւ մայիսի 31-ը մեծ հավանականություն կա, որ իր բնորոշմամբ` բոլոր քաղբանտարկյալներն ազատ արձակվեն: ՀՀԿ-ն քննարկե՞լ է այդ հարցը:

Որքանով տեղյակ եմ, նման հարց չի քննարկվել: Այդ հայտարարությունները կամ վերլուծությունները միգուցե քաղաքական տեխնիկայի կամ քաղաքական որոշակի քայլերի տեսանկյունից է: Որ կա այդ տրամադրվածությունը եւ նման ցանկություն, որպեսզի օրենքի շրջանակներում բոլոր քաղբանտարկյալներն ազատ արձակվեն, դա ակնհայտ է եւ փաստ է: Իսկ, թե ինչ կանխատեսումներ կանի եւ ինչ փաստերի հիման վրա է Արման Մուսինյանը նման բան ասել, միգուցե հենց ինքն էլ մեկնաբանի:

Իսկ դուք հնարավորություն տեսնու՞մ եք, որ ազատ արձակվեն ընդդիմադիր բոլոր ձերբակալվածները:

Ինչքանով գիտեմ այս պահին 5-6 քաղբանտարկյալ է մնացել: Չանտեսելով իրավական դաշտը, մենք գիտենք, որ կոալիցիոն գործընկերները դիմել էին Ազգային ժողովի նախագահին եւ նա էլ խնդրանքով դիմեց հանրապետության նախագահին, որպեսզի համաներմամբ ազատ արձակվեն: Նման քայլերի առկայության պարագայում միգուցե հնարավոր լինի: Այն քայլերը, որ լիցքաթափվի հասարակությունը, վերջին ժամանակներում մենք տեսնում ենք, որ իշխանություններն անում են:

Դրանք այնքան ակնառու են, որ նույնիսկ ՀԱԿ առաջնորդ Լեւոն Տեր-Պետրոսյանն է անդրադարձել եւ ասել (ընդհանուր եմ ասում ոչ իր բառերով), որ սա մեր երազած երկիրն է ու պատկերացրած քաղաքական հարթակը: Կա կառուցողական դաշտ, որտեղ ընդդիմությունն իր գործն է անում, իսկ իշխանությունն էլ իր գործը` կառուցողական առումով:

Դուք էլ ձեռբակալվածներին ասացիք քաղաքական բանտարկյալներ, պատահականությու՞ն էր, թե՞ դուք էլ եք կարծում, որ նրանք քաղաքական բանտարկյալներ են:

Ազատազրկված ասացի, եթե քաղբանտարկյալ եմ ասել, միանշանակ պատահականություն էր: Դա էլ ավտոմեքենայի ղեկին նստած հարցազրույց տալու արդյունքն է: Որպես իրավաբան, կարող եմ բնութագրել, որ քաղբանտարկյալը դա քաղաքական ահայցքների համար դատապարտվածն է, որոնց համար կա առանձին հոդված: Իսկ այն մարդկանց մասին, որ խոսում ենք, նրանք որոշակի արարքներ կամ գործողություներ անելու համար է, որ դատապարտվել են:

ՀԱԿ-ի պահանջներից մեկն էլ արտահերթ ընտրություների անցկացումն է: Եթե իշխանություններն այդ պահանջը չբավարարեն, Ձեր կարծիքով` հնարավո՞ր է քաղաքական վիճակի նոր սրացում լինի:

Մենք տեսնում ենք, որ այդ կառուցողական դաշտի երկուստեք գործողությունները, քայլերը ստացվում են: Մենք չենք ֆիքսվում, որ պահանջները հարկադրանքի միջոցով է կատարվել: Քաղաքականության մեջ ընդունված է, որ իշխանական եւ ընդդիմադիր ուժերը պահանջները ներկայացնում են հրապարակավ, եւ եթե դրանք կառուցողական դաշտից են` իրականացվում են: Եթե նկատենք, վերջին ժամանակներս ՀԱԿ-ի կողմից իրենց հանրահավաքների ժամանակ ստիպողական, հարկադրական հայտարարություններ չեղան, թե կճնշենք կանեն եւ այլն, կառուցողական քայլերն էլ ստացվեց:

Որպես պատգամավոր` կարող եմ ասել, որ այսօր արտահերթ ընտրությունների հիմք չկա: Երբ քայլում ենք փողոցով, շփվում ենք հասարակության հետ, այն լարվածությունը, որ կար 3 տարի, 2 տարի, նույնիսկ 6 ամիս առաջ, այսօր դա չկա քաղաքական դաշտում: Արտահերթ ընտրությունների ռեալ հիմքն այսօր չկա եւ պետք չէ ասել, որ պահանջները չբավարարեն` կգնանք արտահերթ ընտրությունների:

Դա կնմանվի պահի կամ այդ ժամի հրամայականով` քաղաքական քայլերի հերթականություն: Ես չեմ կարծում, որ ընդդիմադիր դաշտի քաղաքական ուժերը, մեր գործընկերները պահի ազդեցության տակ գործեն: Ավելի ռազմավարական, պլանավորված եւ երկարաժամկետ ծրագրերի կողմնակիցն են իրենք, ինչպես եւ մենք, որպես իշխանություն: