Գեղարքունիքի մարզի ընդհանուր իրավասության դատարանի դատավոր Սերոբ Մանուկյանին կարելի է համարել մարզային հարուստ դատավորների մեկը։ Մանուկյանը 2018 թվականի տարեկան հայտարարագրում որպես եկամուտ հայտարարագրել է 26 միլիոն դրամ, 65 հազար դոլլար, 65 հազար եվրո։

Դատավորը 2018-ին ունեցել է նաև 3 վարձակալության հանձնած տարածք, իսկ եկամուտները ձևավորվել են դրանց դիմաց ստացած վարձավճարից և 7 միլիոն դրամ աշխատավարձից։ Դատավորը մոտոցիկլետների սիրահար է։ 2018 թվականին ունեցել է երկու մոտոցիկլետ, որից միայն մեկն է մնացել մինչ տարեվերջ։

Նույնչափ ֆինանսական միջոցներ դատավորն ունեցել է նաև 2017 թվականին։ Սակայն նրա վարձակալության հանձնած տարածքներն առավել մեծաքանակ են եղել․ ունեցել է 5 վարձակալության հանձնած տարածք, որից ստացված վարձավճարներից և 7 միլիոն դրամ աշխատավարձից է գոյացել նրա եկամուտը։ Սերոբ Մանուկյանի 2011 թվականից էթիկայի հանձնաժողով ներկայացրած հայտարարագրերի ուսումնասիրությունից պարզվում է, որ 2017 թվականին դատավորն ունեցել է իր՝ 2011 թվականից հայտարարագրած ամենաշատ վարձակալության տված տարածքները, իսկ այդ տարիներին մշտապես հայտարարագրել է ֆինանսական միջոցներ, վարձակալության հանձնած տարածքներ։

«Գուցե ես հիմա այդպես չեմ կարող հիշել, որ պատասխանեմ։ Կարող եք հերթով նայելով գնաք, տեսնել որտեղից, ինչքան է գոյացել, ինչքան է ավելացել, ինչքան է պակասել»,- data.hetq.am-ի հետ զրույցում ասաց Մանուկյանը և հավելեց, որ իր ունեցվածքը ձևավորվել է այն միջոցներից, որոնք նշված են հայտարարագրում։

Սերոբ Մանուկյանն արդեն 12 տարի է, ինչ աշխատում է որպես դատավոր։ Հայտարարագրած դրամական միջոցներն ունենալու համար նա տարեկան միջինը 7,5 մլն դրամ պետք է կուտակեր։ Դատավորի հայտարարագրից երևում է, որ 2011-ից մինչ օրս նրա տարեկան միջին եկամուտը եղել է մոտ 15 մլն դրամ, որից 6,5 մլն-ը՝ աշխատանքի դիմաց վարձատրություն, իսկ մնացածը՝ անշարժ գույքի վարձակալության դիմաց ստացված վճար։ Անդրադառնալով վարձակալության հանձնած գույքի ծագմանը՝ դատավորն ասաց, որ դրանք ձեռք են բերվել վաղուց՝ ընտանեկան միջոցների հաշվին։