34-ամյա Արթուր Գևորգյանը, ով 2017թ-ին նշանակվել է Գեղարքունիքի մարզի դատախազության դատախազ, պաշտոնը ստանձնելուց մեկ տարի անց «նվեր» է ստացել 73 միլիոն դրամ (մոտ 150 հազար ԱՄՆ դոլար)։ Ըստ դատախազության՝ data.hetq.am-ին տրված պարզաբանման, դատախազը նման խոշոր նվիրատվությունը ստացել է հորից՝ Սամսոն Գևորգյանից։

Սամսոն Գևորգյանը հանդիսանում է Երևան-Սևան մայրուղու վրա գործող «Սեմոյի մոտ» ռեստորանային համալիրի սեփականատերը։ Նրա անունով է գրանցված ռեստորանային համալիրը շահագործող «ԳԵՎՈՐԳՅԱՆԻ ՔՈԼԵԹ» ՍՊԸ-ն։

Բացի այդ՝ երիտասարդ դատախազը պաշտոնավարման առաջին տարում հայտարարագրել է 47 միլիոն դրամի (մոտ 98 հազար ԱՄՆ դոլար) վերցված փոխառություն, 126 միլիոն դրամ (մոտ 264 հազար ԱՄՆ դոլար) արժողությամբ բնակարան և երկու ավտոտնակ։ Նշված ունեցվածքը դատախազը ձեռք է բերել պաշտոնը ստանձնելուց հետո, ում միակ եկամուտը եղել է տարեկան 4,8 միլիոն դրամ (մոտ 10 հազար ԱՄՆ դոլար) աշխատավարձը։

Մինչ պաշտոնը ստանձնելը Գևորգյանն ունեցել է «TOYOTA LAND CRUISER PRADO V4 2.7L» մակնիշի ավտոմեքենա, 10 հազար ԱՄՆ դոլար, 5 հազար եվրո և 5 մլն դրամ և 8 միլիոն դրամը գերազանցող զարդ։ Նրա միակ եկամուտը պաշտոնը ստանձնելուց առաջ եղել է տարեկան մոտ 1,8 միլիոն դրամ աշխատավարձը։

Տարօրինակ կերպով դատախազի 2018 թվականի տարեկան հայտարարագիրը, որը լրացվել է 2019-ի մարտին, համեստ է՝ առանց որևէ անշարժ և շարժական գույքի, թանկարժեք զարդի, դոլլարային և եվրոյով ֆինանսական միջոցների։ Ըստ հայտարարագրի՝ դատախազի ունեցած միակ դրամական միջոցը 4 մլն դրամն է, իսկ միակ եկամուտը՝ տարեկան 4,8 միլիոն դրամ աշխատավարձը։