HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Արաքս Մամուլյան

Սահմանադրական դատարանը հրապարակեց Քոչարյանի դիմումի գործով որոշման եզրափակիչ մասը

Սահմանադրական դատարանը քիչ առաջ հրապարակեց Հայաստանի երկրորդ նախագահ Ռոբերտ Քոչարյանի դիմումի գործով որոշման եզրափակիչ մասը:

Խոսքը ՀՀ քրեական դատավարության օրենսգրքի 35-րդ հոդվածի և 135-րդ հոդվածի 2-րդ մասի` քրեական գործի վարույթը կամ քրեական հետապնդումը բացառող հանգամանքները և խափանման միջոց կիրառելու հիմքերը սահմանող հոդվածների Սահմանադրությանը համապատասխանությունը ստուգելու վերաբերյալ Քոչարյանի դիմումի մասին է:

Սահմանադրական դատարանը որոշեց.

1. ՀՀ քրեական դատավարության օրենսգրքի 35-րդ հոդվածը Սահմանադրության ուժով, հատուկ պաշտպանությամբ օժտված պաշտոնատար անձանց գործառութային անձեռնմխելիությունը քրեական գործի վարույթը կամ քրեական հետապնդումը բացառող հանգամանքների թվում չնախատեսելու մասով ճանաչել Սահմանադրության 27-րդ հոդվածի 1-ին մասի 4-րդ կետին, 61-րդ հոդվածի 1-ին մասին և 63-րդ հոդվածի 1-ին մասին և 78-րդ հոդվածներին հակասող և անվավեր։

2. ՀՀ քրեական դատավարության օրենսգրքի 135-րդ հոդվածի 2-րդ մասը համապատասխանում է Սահմանադրությանը:

Որոշումը հրապարակած ՍԴ նախագահ Հրայր Թովմասյանը հայտնեց, որ Սահմանադրական դատարանի երկու դատավոր՝ Ֆելիքս Թոխյանը և Արման Դիլանյանը ունեն հատուկ կարծիք։

Որոշումը ՍԴ կայքում կհրապարակվի հնգօրյա ժամկետում։

Քոչարյանի պաշտպաններից Արամ Վարդևանյանը լրագրողների հետ զրույցում ասաց, որ Քոչարյանը չէր կարող կալանավորվել, նշեց՝ ստացվում է, որ խախտվել է նրա անձնական ազատության իրավունքը:

Նշենք, որ դատարանը դիմումը քննել է գրավոր ընթացակարգով, և երեկ՝ սեպտեմբերի 3-ին, հեռացել խորհրդակցական սենյակ որոշում կայացնելու:

Հիշեցնենք որ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ կետով` սահմանադրական կարգը տապալելու և առանձնապես խոշոր չափերով կաշառք ստանալու մեջ:

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։
Եթե գտել եք վրիպակ, ապա այն կարող եք ուղարկել մեզ՝ ընտրելով վրիպակը և սեղմելով CTRL+Enter