HY RU EN
Asset 3

Բեռնվում է ...

Էջի վերջ Այլ էջեր չկան բեռնելու համար

Որոնման արդյունքում ոչինչ չի գտնվել

Սեդա Հերգնյան

Հայաստան ժամանած զբոսաշրջիկների թիվն առաջին կիսամյակում 12.3%-ով աճել է

Հայաստան ժամանած զբոսաշրջիկների թիվն այս տարվա առաջին կիսամյակում կազմել է 770 055։ Ինչպես տեղեկանում ենք Վիճակագրական կոմիտեի (ՀՀ ՎԿ) հրապարակած տվյալներից, 2018 թվականի առաջին կիսամյակի համեմատ Հայաստան այցելած զբոսաշրջիկների թիվն աճել է 12.3 %-ով։

Զբոսաշրջիկների մեծ մասը տեղավորվում է բարեկամի կամ հարազատների տանը, վարձով բնակարաններում և այլն։ Նրանք կազմել են առաջին կիսամյակում Հայաստան ժամանած զբոսաշրջիկների 71 %-ը։ Սա նշանակում է, որ Հայաստան ժամանող զբոսաշրջիկների մեծ մասն արտասահմանում ապրող հայերն են։

Իսկ հյուրանոցային տնտեսության օբյեկտներում տեղավորվել է զբոսաշրջիկների միայն 29 %-ը։

Ըստ ՄԱԿ-ի զբոսաշրջության համաշխարհային կազմակերպության (ԶՀԿ) մեթոդաբանության (International Recommendations for Tourism Statistics 2008, Compilation Guide, UN WTO, Madrid, November 2010)` միջազգային զբոսաշրջիկ է համարվում ցանկացած անձ, որը հանգստանալու, բուժվելու, հարազատներին այցելելու, գործնական, կրոնական կամ այլ նպատակներով ճանապարհորդում է իր հիմնական բնակության վայրից մեկ այլ վայր ոչ պակաս, քան 24 ժամ և ոչ ավել, քան անընդմեջ 1 տարի ժամանակով: Այսինքն` նրա հիմնական նպատակը ճանապարհորդելն է, այլ ոչ թե աշխատանքային գործունեությամբ զբաղվելը, որի դեպքում ուղևորության համար վճարումները կկատարվեին ժամանած վայրում աշխատանքային գործունեությունից ստացված ֆինանսական միջոցների հաշվին:

Հայաստան եկած և հյուրանոցային տնտեսության օբյեկտներում տեղավորված զբոսաշրջիկների թիվն այս տարվա առաջին կիսամյակում կազմել է 222 576, որը նախորդ տարվա նույն կիսամյակի համեմատ 59.6%-ով աճել է։ Հյուրանոցներից ստացված տվյալների հիման վրա Վիճկոմիտեն հաշվարկել է, որ նշված 222 576 զբոսաշրջիկների 26.5%-ն ԱՊՀ երկրներից է, հիմնականում՝ Ռուսաստանից։ ԵՄ երկրներից է նրանց 25.2%-ը, 48.3%-ն էլ՝ այլ եկրներից։ ԵՄ երկրների շարքում առավել մեծ է Գերմանիայից ու Ֆրանսիայից ժամանած ուղևորների տեսակարար կշիռը։ Իսկ այլ երկրների շարքում առանձնանում են ԱՄՆ-ն ու Իրանը։

Ըստ Վիճկոմիտեի՝ այս տարվա առաջին կիսամյակում Հայաստան ժամանած զբոսաշրջիկների կեսից ավելին՝ 54.4%-ը, ժամանել է հանգստի և ժամանցի նպատակով, 16.4%-ը՝ գործնական այցով, 0.6%-ը՝ բուժման նպատակով և մնացած՝ 28.6%-ը՝ այլ նպատակներով։

Հայաստանից մեկնողների փոքր մասն է օգտվում զբոսաշրջային գործակալություններից

 Այս տարվա առաջին կիսամյակում Հայաստանից զբոսաշրջության նպատակով արտասահման մեկնածների թիվը կազմել է 684 808, որը 2018 թվականի առաջին կիսամյակի համեմատ աճել է 12.1%-ով։

Չնայած զբոսաշրջային գործակալությունների միջոցով ուղևորությունը կազմակերպողների թիվն աճել է այս տարի, սակայն նրանց տեսակարար կշիռը զբոսաշրջիկների ընդհանուևր թվի մեջ բավականին փոքր է։ Մասնավորապես, այս տարվա առաջին կիսամյակում Հայաստանից զբոսաշրջության նպատակով մեկնածներից 3 729 հոգի իր ուղևորությունը կազմակերպել է գործակալությունների միջոցով։ Այսինքն՝ ընդհանուր մեկնողների 0.5 %-ը։ 2018 թվականի առաջին կիսամյակի համեմատ զբոսաշրջային գործակալությունների ծառայություններից օգտվողների թիվը 3.4 անգամ աճել է։

Իսկ մեկնողների 99.5%-ն ինքնուրույն է կազմակերպել ուղևորությունը։

Հայաստանից մեկնող զբոսաշրջիկները ևս մեծամասամբ հանգստի ու ժամանացի նպատակով են գնացել՝ 75.4 %-ը։ Գործնական նպատակով մեկնել է 24.2 %-ը, և մնացած 0.4%-ն՝ այլ նպատակներով։

Մեկնաբանություններ (1)

HAGOP
GOOD FOR TOURISTS TO TRAVEL TO ARMENIA!!!!!! THIS IS A TEST FOR ARMENIANS IN ARMENIA NOT TO SCREW THIS UP!!!!!!! TREAT TOURISTS WITH RESPECT, SMILE AND DO NOT STEAL THEIR MONEY OR DO CORRUPTION OR TOURISTS WILL NEVER RETURN!!!!!!!!!! ARMENIA DON'T BE STUPID!!!!!!!!!!!!!

Մեկնաբանել

Լատինատառ հայերենով գրված մեկնաբանությունները չեն հրապարակվի խմբագրության կողմից։