Տեսանյութեր
Լուսանկարներ
«Գնահատման և թեստավորման կենտրոն»-ի կառավարման լիազորությունները վերցնել կառավարության աշխատակազմից․նոր նախագիծ
Կրթության, գիտության, մշակույթի և սպորտի նախարարությունն առաջարկում է «Գնահատման և թեստավորման կենտրոն» ՊՈԱԿ-ի լիազոր մարմնի իրավասությունները փոխանցել իրենց նախարարությանը։ Նշենք, որ գործող կարգով դրա կառավարումն իրականացնում է Կառավարության աշխատակազմը։
Նման առաջարկություն է նախարարությունը քննարկման ներկայացրել իրավական ակտերի նախագծերի հրապարակման միասնական կայքում։
Կրթության, գիտության, մշակույթի և սպորտի նախարարության հաղորդմամբ՝ ՊՈԱԿ-ի լիազորություններն իրենց փոխանցելու գործընթացը կնպաստի կենտրոնի գործառույթներն առավել արդյունավետ իրականացնելուն:
Մասնավորապես՝ կապահովի սովորողների գիտելիքների, կարողությունների և հմտությունների գնահատման նպատակով նյութերի և առաջադրանքների մշակմանը, ուսումնական գործընթացում գնահատման նոր ձևերի արդյունավետ օգտագործման նպատակով կկազմակերպվեն մանկավարժների մեթոդական օժանդակության ծրագրեր, կանցկացվեն սովորողների գիտելիքների, կարողությունների ու հմտությունների գնահատման ազգային և միջազգային ստուգատեսներ։
Նշենք, որ «Գնահատման և թեստավորման կենտրոն» ՊՈԱԿ-ը հիմնադրվել է Կառավարության 2004 թվականի որոշմամբ։ Կազմակերպության գործունեության առարկան կրթական հաստատությունների սովորողների և բարձրագույն ուսումնական հաստատություններ ընդունվողների գիտելիքների, կարողությունների ու հմտությունների գնահատումն է:
Մեկնաբանել