Երեկ հայտնի դարձավ հայ մեծանուն գրող Հովաննես Թումանյանի թբիլիսյան տան գինը: Բնակարանի սեփականատեր Արչիլ Լեժավան գրողի տան դիմաց 145 հազար դոլար է պահանջում: Այս օրերին Թբիլիսիում գտնվող հայկական պատվիրակությունը, որը ղեկավարում է Գրողների միության նախագահ Լևոն Անանյանը, Լեժավայի հետ բանակցություններ է վարել գնի վերաբերյալ: Ինչպես Թբիլիսիից «Հայացք»-ին տեղեկացրեց Լևոն Անանյանը, Լեժավան գնի հարցում զիջումների գրեթե չի գնացել: «Շատ ավելի լավ կլիներ, որ ավելի էժան լիներ, բայց սեփականատերը շատ անդրդվելի էր: Նա տարածքում համարժեք բնակարան էր ուզում: Բայց այդ թաղամասում շատ անհամաչափ բնակարաններ են` մի մասը կիսավթարային են, մի մասը` էլիտար: Ինքը մատը դնում էր էլիտարի վրա, գինը կրկնակի էր լինում` 240 հազար դոլար, մենք էլ մատներս դնում էինք էժանագինի վրա: Քանի որ վերջին խոսքն իրենն էր, վերջապես համաձայնեց, որ այդ գումարը տանք, որը կտնօրինի սեփական հայեցողությամբ»,- պատմեց Անանյանը:

Հիշեցնենք, որ Հովհաննես Թումանյանի թբիլիսյան տունը գնելու պատրաստակամություն են հայտնել Գյումրիի քաղաքապետն ու նրա եղբայրները: Ավելի շուտ, ըստ շրջանառվող խոսակցությունների, ՀՀԿ-ական քաղաքապետին պարզապես «վերևներից» ստիպում են գնել այդ տունը: Լևոն Անանյանից հետաքրքրվեցինք` Վարդան Ղուկասյանը չի՞ դժգոհել` լսելով գնի մասին:

«Ղուկասյանները, Թումանյանին բարձր գնահատելով, իրենց նվիրում են այդ գործին:

Գործարքն արդեն օրերս կկնքվի, և տունը կնվիրվի կամ Վրաստանի հայ համայնքին, կամ եկեղեցուն, ինչպես որ կորոշվի»,- պատասխանեց նա:

Այնինչ Վարդան Ղուկասյանի տրամադրությունը երեկ շատ վատ էր: Ակնհայտ էր, որ տան գնի վերաբերյալ լուրը նրան չէր ուրախացրել և սթրեսի մեջ էր գցել, չնայած որ տակավին վերջերս Վարդան Ղուկասյանը մի շարք լրատվամիջոցներով հայտարարեց, թե իրենք եղբայրներով պատրաստ են գնել այդ տունը: Երեկ Վարդան Ղուկասյանին հարցրինք` պատրա՞ստ են այդքան գումար վճարել` Թումանյանի տունը գնելու համար: Ի պատասխան նա տխուր տոնով ասաց, որ չի ուզում պատասխանել մեր հարցերին:

ՌՈԶԱ ՀՈՎՀԱՆՆԻՍՅԱՆ